Svanborg hefur störf hjá Viðreisn

Svanborg Sigmarsdóttir stjórnmálafræðingur hefur tekið til starfa sem framkvæmdastjóri borgarstjórnarflokks Viðreisnar og verkefnastjóri sveitarstjórnarmála.

Þetta kemur fram í tilkynningu frá skrifstofu flokksins.

Þar segir að undanfarinn áratug hafi Svanborg starfað sem upplýsingafulltrúi opinberra aðila, nú síðast hjá Ríkisendurskoðun. Áður hafi hún starfað sem blaðamaður á Fréttablaðinu og kennt áfanga í stjórnmálafræði við Háskóla Íslands og Háskólann á Bifröst.

Haft er eftir Svanborgu að hugsjónir Viðreisnar um frjálslyndi, frelsi, jafnréttismál, umhverfismál og alþjóðasamvinnu rími vel við hennar sannfæringu um gott og réttlátt samfélag.