Ók undir áhrifum fíkniefna eftir að hafa verið sviptur ævilangt

Ökumaður sem lögreglan á Suðurnesjum tók úr umferð í vikunni vegna gruns um vímuefnaakstur reyndist vera sviptur ökuréttindum ævilangt. Sýnatökur á lögreglustöð sýndu jákvæða niðurstöðu á neyslu fíkniefna.

Þá fundust fíkniefni í bifreiðinni sem var í stakasta ólagi hvað varðaði hjólabúnað og öryggisbelti sem virkuðu ekki. Farþegi í bifreiðinni var með fíkniefni innan klæða sem hann framvísaði við lögreglu. Þetta kemur fram í tilkynningu frá lögreglunni.

Annar ökumaður sem tekinn var úr umferð játaði fíkniefnaneyslu og var með fíkniefni í hanskahólfi bifreiðarinnar.