Kjartan Henry og Guðlaugur Victor á skotskónum

Kjartan Henry Finnbogason skoraði eitt mark Vejle í 4-0 sigri á Fremad Amager í dönsku B-deildinni í dag.

Kjartan Henry er markahæstur í deildinni með ellefu mörk, fjórum mörkum meira en næstu menn.

Vejle er með eins stigs forskot á Viborg á toppi deildarinnar. Vejle hefur ekki tapað í ellefu deildarleikjum í röð.

Guðlaugur Victor Pálsson var á skotskónum þegar Darmstadt tapaði fyrir Greuther Fürth í þýsku B-deildinni. Þetta var annað mark Victors á tímabilinu.

Darmstadt er í 14. sæti deildarinnar með 14 stig, fimm stigum frá fallsæti.