Rann í gegnum hurðina og endaði í bíl­skúr ná­grannans

Umferðaróhapp varð í Árbænum á sjötta tímanum í gær þegar mannlaus bíll rann aftur á bak, braust í gegnum bílskúrshurð hjá nágranna og endaði loks inni á bílskúrsgólfi.

Skemmdir urðu á bifreiðinni, bílskúrshurðinni og munum í bílskúrnum, til að mynda tjaldvagni, að því er fram kemur í dagbók lögreglu.

Þá stóð lögregla að nokkuð umfangsmiklu eftirliti með umferð í bæði Ártúnsbrekku og á Kringlumýrarbraut við Fossvog milli klukkan 20 og fram undir morgun.

Tíu ökumenn voru kærðir fyrir of hraðan akstur á Kringlumýrarbraut. Einn ökumaðurinn mældist á 106 kílómetra hraða, þar sem hámarkshraði er 80. Hann reyndist jafnframt aka ölvaður og sviptur ökuréttindum.

Fjórir ökumenn voru kærðir fyrir of hraðan akstur í Ártúnsbrekku. Einn ökumaðurinn reyndist aðeins 17 ára og ók á 126 kílómetra hraða, þar sem hámarkshraði er 80. Málið var afgreitt með aðkomu forráðamanna og tilkynningu til Barnaverndar.

Þá var 16 ára stúlka, sem aldrei hafði öðlast ökuréttindi, stöðvuð á rúntinum með vinkonu sinni. Málið var unnið með aðkomu forráðamanna og tilkynningu til barnaverndar.