Seðlabankinn eykur aðgang fjármálafyrirtækja að lausafé

Fjármálafyrirtækjum verður boðin sérstök og tímabundin lánafyrirgreiðsla í formi veðlána frá Seðlabanka Íslands sem er ætlað að auk aðgang fyrirtækjanna að lausafé. Seðlabankinn segir þetta gert til að bregðast við fordæmalausu ástandi vegna kórónuveiruheimsfaraldursins.

Í tilkynningu frá Seðlabankanum kemur fram að fyrsta útboðið verði haldið miðvikudaginn 22. apríl. Bankinn hafi breytt reglum um viðskipti við hans við fjármálafyrirtæki. Þá hafi veðlisti Seðlabankans verið uppfærður og útvíkkaður tímabundið.

Með breytingunum geta fjármálafyrirtæki lagt fram peningamarkaðslán ríkissjóðs og veðbréf með veð í viðskiptabréfum sem tryggingu í viðskiptum við Seðlabankann.