Boða til fundar á Suðurnesjum um kjaraviðræður á háannatíma á Keflavíkurflugvelli

Boðað hefur verið til fundar hjá Landssambandi lögreglumanna á Suðurnesjum í dag. Stjórn sambandsins mun funda í Reykjanesbæ klukkan 15 og verður svo haldinn almennur félagsfundur klukkan 16. Háannatími verður á Keflavíkurflugvelli, en sex vélar eiga að lenda þar á milli klukkan 14:45 og 16:30 og hafa lögreglumenn sem sinna landamæraeftirliti fengið boð á fundinn.

„Allir lögreglumenn á Suðurnesjum fengu þetta fundarboð. Stjórn Landssambands lögreglumanna ákvað að funda á Suðurnesjum í dag um stöðuna í kjaraviðræðum og í framhaldi af því ætluðum við að nota tækifærið og halda þarna almennan félagsfund með félagsmönnum Landssambandsins á Suðurnesjum til að gera þeim grein fyrir þeirri stöðu sem viðræðurnar eru í,“ segir Snorri Magnússon, formaður Landssambands lögreglumanna í samtali við fréttastofu.

Hann segir að alla jafna sé mjög góð mæting á slíka fundi á Suðurnesjum en lögreglumenn á vakt hafa rétt á því að mæta á fundinn samkvæmt lögum um kjarasamninga. „Það reyndar helgast af verkefnastöðu hverju sinni og þeir sem eru á vakt þegar svona félagsfundir eru haldnir, þeir eru allir með talstöðvar á sér til að bregðast við ef eitthvað kemur upp á. Alla jafna þegar haldnir eru félagsfundir eru einhverjir félagsmenn á vakt en þeir hafa rétt til að mæta til fundarins og hlaupa þá út af honum í þau verkefni sem upp koma,“ segir Snorri.

Lögreglumenn hafa verið samningslausir frá 1. apríl 2019 og sér ekki fyrir endann á viðræðunum.

„Staðan er algjörlega óbreytt í rauninni frá fyrsta degi má segja. Það er búið að ná samkomulagi um stór og veigamikil atriði sem skipta verulegu máli eins og stytting vinnuvikunnar og önnur því um líkt. Launaliðurinn er algerlega eftir hjá okkur, óhreyfður, og einnig það sem í fréttum hefur verið kallað „gamlar syndir“ og þar erum við að horfa til leiðréttingar launa. Fjármálaráðherra sjálfur hefur í pontu á Alþingi sagt að nemi einhverjum níu prósentum í tilfelli lögreglumanna.“

Það sem Snorri kallar „gamlar syndir“ eru bókanir frá síðustu kjarasamningum sem gerðir voru 2014 og 2015 sem lögreglumenn vilja að verði útkljáðar. Snorri segir að bókanirnar snúist um greiðslur fyrir aukna ábyrgð, álag og breytt vinnufyrirkomulag.

Ekki hefur verið boðað til fundar hjá samninganefndum ríkisins og Landssambands lögreglumanna. Rúmar tvær vikur eru liðnar frá síðasta fundi en hann var haldinn 28. maí síðastliðinn.

Hann segir ekki sjá fyrir endann á viðræðunum. „Ekkert frekar en hjá hjúkrunarfræðingum.“

Á fundinum í dag verður farið yfir stöðuna á kjaraviðræðunum eins og hún er í dag og hvað hafi náðst fram á því sem „kallað er stóra borðið hér í kjaraviðræðunum. BSRB fór fram með kröfu um styttingu vinnuvikunnar og að því leitinu til voru atriði sem náðust í gegn og eru verulega góð og skipta gríðarlega miklu máli,“ segir Snorri.