Rekinn nokkrum dögum eftir hléið langa

Spænska knattspyrnufélagið Real Betis hefur sagt þjálfaranum Rubi upp og mun Alexis Trujillo stýra liðinu það sem eftir lifir keppnistímabilsins.

Real Betis hefur aðeins fengið eitt stig í leikjunum þremur eftir þriggja mánaða hlé í spænsku deildinni vegna kórónuveirufaraldursins. Liðið tapaði gegn Athletic Bilbao í gær, 1-0, og það var kornið sem fyllti mælinn. Real Betis er með 34 stig eftir 30 leiki, í 14. sæti deildarinnar.

Trujillo er öllum hnútum kunnugur hjá félaginu en hann lék yfir 250 leiki fyrir Betis á árunum 1993 til 2000 og hefur áður verið aðstoðarþjálfari eða fyllt í skarð aðalþjálfara eins og nú, en nú síðast var hann yfirmaður íþróttamála hjá félaginu.