Rannsókn lokið og allir sektaðir nema einn

Rannsókn lögreglunnar á höfuðborgarsvæðinu á málum 11 einstaklinga sem grunaðir voru um brot á sóttvarnalögum með því að hafa ekki fylgt reglum um sóttkví er lokið. Allir nema einn hafa verið sektaðir vegna brotanna. Þetta kemur fram í tilkynningu frá lögreglunni á höfuðborgarsvæðinu.

Málin varða rúmenska ríkisborgara sem komu hingað til lands sem ferðamenn 5. og 8. júní og áttu að vera í sóttkví í 14 daga en sinntu því ekki.

Auk sektarinnar hefur Útlendingastofnun tekið ákvörðun um að vísa sjö þessara einstaklinga úr landi á grundvelli almannaheilbrigðis, að því er segir í tilkynningu. Greint var frá brottvísuninni fyrr í dag.

Þá tekur lögregla sérstaklega fram að embættið hafði engin önnur brot umræddra einstaklinga til rannsóknar.