Guðjón frá Origo til Póstsins

Guðjón Ingi Ágústsson segir frábært að hafa gengið til liðs við Póstinn. Margt spennandi sé að gerast hjá fyrirtækinu, ekki síst á sviði upplýsingatækni sem séu hans ær og kýr.

Guðjón hefur þegar tekið við stöðu tæknirekstrarstjóra hjá Póstinum og ber þar m.a. ábyrgð á rekstri tölvukerfa Póstsins og innri tækniþjónustu. Þar er menntun hans frá Kaupmannahafnarháskóla sögð koma að góðum notum, en þaðan útskrifaðist Guðjón með M.Sc. gráðu í upplýsingatækni og viðskiptum. Þaðan hélt leið hans t.a.m. til Origo, en þar fór hann fyrir hópi fólks sem sá um öryggislausnir og ráðgjöf hjá upplýsingatæknifyrirtækinu.

En hafa ekki starfsmannamál Póstsins einkennst af fjöldauppsögnum og niðurskurði að undanförnu? Skýtur ekki skökku við að ráða nýjan yfirmann í þeirri hagræðingu sem er að eiga sér stað innan fyrirtækisins?

Georg Haraldsson, forstöðumaður stafrænna lausna og upplýsingatækni hjá Póstinum, segir fyrirtækið hafa lagt „höfuðáherslu á að fá rétta fólkið“ til liðs við sig eins og hann orðar það í tilkynningu sem send er út vegna ráðningar Guðjóns. „Þess vegna erum við mjög ánægð með að hafa fengið Guðjón til starfa.“