Aftur nær Bayern í markvörð frá Schalke

Þýski markvörðurinn Alexander Nubel mun ganga til liðs við þýska meistaraliðið Bayern Munchen næsta sumar á frjálsri sölu.

Þessi 23 ára gamli markvörður hefur varið mark Schalke undanfarin tvö tímabil og var gerður að fyrirliða félagsins í upphafi yfirstandandi leiktíðar.

Hjá Bayern hittir hann fyrir Manuel Neuer og mun keppa við hann um stöðuna á milli stanganna hjá Bæjarastórveldinu. Nubel gerir fimm ára samning við Bayern en hann á 17 leiki að baki fyrir U21 árs landslið Þýskalands.

Stuðningsmenn Schalke hafa séð þetta áður því Neuer lék með félaginu til ársins 2011 og var þá nýorðinn fyrirliði félagsins þegar hann færði sig um set til Bayern Munchen.