Gripinn með met­am­feta­mín og kókaín í tíu smellu­lás­pokum

Ökumaður, sem lögreglan á Suðurnesjum stöðvaði nýverið vegna gruns um að hann æki undir áhrifum fíkniefna, reyndist með metamfetamín og kókaín í tíu smelluláspokum í fórum sínum. Einnig fundust síðar fíkniefni á heimili mannsins við húsleit, að því er fram kemur í tilkynningu frá lögreglu.

Þá lagði lögregla hald á sextíu þúsund krónur vegna gruns um að um væri að ræða ágóða af fíkniefnasölu. Maðurinn viðurkenndi eign sína á fíkniefnunum við skýrslutöku.

Lögregla fann jafnframt umtalsvert magn af kannabisefnum við aðra húsleit í umdæminu. Húsráðandi framvísaði kannabisefni við komu lögreglumanna og við leit fundust efni, bæði í íbúðinni og bílskúr í ýmsum ílátum. Einnig fundust vigt og töluvert margir smelluláspokar.

Húsráðandi játaði að eiga efnin en neitaði að hafa haft í hyggju að selja þau, að því er segir í tilkynningu lögreglu.