Gekk berserksgang vopnaður öxi, járnröri og stórum hníf en gengur laus

Ungur karlmaður sem reif upp öxi og braut og bramlaði í verslun úrsmiðs í Reykjanesbæ í síðustu viku gengur laus. Þetta er niðurstaða Landsréttar sem felldi úr gildi fjögurra vikna gæsluvarðhald sem Héraðsdómur Reykjaness hafði fallist á.

Landsréttur telur enga rannsóknarhagsmuni vera fyrir hendi auk þess sem maðurinn hafi ekki valdið neinu líkamstjóni. Maðurinn segist hafa verið svo fullur að hann muni ekkert eftir atvikum í versluninni.

Dró öxi úr poka sínum

Það var fimmtudaginn 21. febrúar sem ungur karlmaður mætti í skartgripaversluninni George V Hannah. Lögreglustjórinn á Suðurnesjum lýsir því þannig að maðurinn hafi dregið öxi upp úr poka og byrjað að öskra og slá með öxinni í afgreiðsluborð. 

Þá hafi hann sveiflað öxinni til þeirra sem voru inni í versluninni og sett verðmæti í plastpoka. Þrír voru í versluninni og óttuðust um líf sitt að sögn lögreglunnar. Málið sé rannsakað sem tilraun til stórfelldrar líkamsárásar eða manndráps, ásamt ráni. 

„Ég upplifði okkur kannski ekki í lífshættu þó vissulega höfum við verið það. Ég hafði meiri áhyggjur af gömlu hjónunum, mömmu og pabba, því maðurinn hélt á öxi og sveiflaði henni að okkur þar sem við stóðum í hurðaropinu inni í búðinni,“ sagði Eggert Hannah gullsmiður í samtali við Víkurfréttir.

Eggert tók við rekstri verslunarinnar fyrir þremur árum. Fram hefur komið að Georg Viðar, faðir Eggerts, notaði ryksugurör til að halda manninum frá sér.

„Hann lamdi bara endalaust með öxinni í allt. Þetta var rosalegt. Við gátum ekkert farið nær honum því hann hélt þá exinni í áttina að okkur,“ sagði Georg Viðar.

Næstum með áfengiseitrun

Maðurinn hafi eftir handtöku verið færður til læknisskoðunar og þaðan á geðdeild Landspítalans. Þar var lögreglu tjáð að maðurinn væri svo drukkinn að hann væri næstum með áfengiseitrun. Myndskeið úr öryggismyndavél skartgripaverslunarinnar sýnir hvað á gekk.

Lögreglustjóri segir rannsókn á frumstigi en stefnt sé á að ljúka henni sem fyrst og gefa út ákæru. Á grundvelli rannsóknarhagsmuna sé mikilvægt að maðurinn sæti gæsluvarðhaldi. Sömuleiðis sé hann hættulegur sjálfur sér og umhverfi sínu gangi hann laus. Það gæti sært réttarvitund almennings gangi hann laus.

Verjandi mannsins mótmælti þessu og taldi ekki rök fyrir gæsluvarðhaldi. Atvikið sé til á myndupptöku og því litlir rannsóknarhagsmunir í húfi. Þá eigi maðurinn sé enga sögu um afbrot og sé ekki ofbeldissinnaður.

Héraðsdómari vísar til myndbandsupptökunnar sem sýni manninn taka öxi upp úr plastpoka og því næst ganga berserksgang, brjóta allt og bramla, taka fjölda muna og stinga ofan í poka, ógna starfsfólki með öxinni, sveifla henni í átt að þeim og virðist svo henda öxinni í áttina að starfsfólki áður en hann heldur úr versluninni.

Stór hnífur og járnrör í bakpokanum

Þar sem ekki hafði tekist að taka skýrslu af manninum, vegna ástands hans, var fallist á gæsluvarðhald í þágu rannsóknarhagsmuna þann 22. febrúar. Þá vísaði dómarinn til játningu um að hafa verið ofurölvi þegar hann fór inn í verslunina og segist ekkert muna. Þá var í bakpoka mannsins að finna stóran hníf og járnrör. Að því sögðu taldi héraðsdómur nauðsynlegt að setja manninn í gæsluvarðhald til að verja aðra fyrir mögulegum árásum.

Féllst Jónas Jóhannsson héraðsdómari á fjögurra vikna gæsluvarðhald í héraði. Var maðurinn í haldi lögreglu allt þar til á þriðjudaginn þegar Landsréttur tók kæru verjanda mannsins fyrir og sá hlutina öðrum augum en héraðsdómur.

Landsréttur féllst á að maðurinn væri undir rökstuddum grun um háttsemi sem fangelsisrefsing sé lögð við. Hins vegar hafi lögreglustjórinn á Suðurnesjum hvorki sýnt fram á að maðurinn geti truflað rannsókn málsins væri hann frjáls ferða né að gæsluvarðhald sé nauðsynlegt til að verja aðra fyrir árásum. Þá hafi maðurinn valdið miklu eignatjóni en þó ekki líkamstjóni.

Var gæsluvarðhaldsúrskurðurinn felldur úr gildi af þremur dómurum Landsréttar á þriðjudag. Úrskurðurinn var birtur á vef Landsréttar í gær.