Körfubolti

Lakers vann nágranna sína í Clippers í fyrsta sinn í vetur

Óskar Ófeigur Jónsson skrifar
LeBron James og Anthony Davis voru kátir eftir sigurinn á Clippers í nótt.
LeBron James og Anthony Davis voru kátir eftir sigurinn á Clippers í nótt. Getty/Andrew D. Bernstein
Los Angeles Lakers endaði sex leikja sigurgöngu Los Angeles Clippers með sigri í stórleiknum í NBA deildinni í körfubolta en Clippers hafði unnið tvo fyrstu leiki liðanna á leiktíðinni. Þetta var líklega besta helgi LeBron James síðan hann kom til Lakers liðsins.



 



Anthony Davis skoraði 30 stig fyrir Los Angeles Lakers í 112-103 sigri á Los Angeles Clippers í skráðum heimaleik Clippers en þau spila náttúrulega bæði í Staples Center. LeBron James var líka mjög öflugur með 28 stig, 7 fráköst og 9 stoðsendingar.

Lakers liðið fékk líka 24 stig frá bakverðinum Avery Bradley en þetta var fjórði sigur Los Angeles Lakers í röð og sá ellefti í síðustu tólf leikjum.





Það gæti vel farið svo að nágrannarnir mætist í úrslitakeppninni og það var rafmögnuð stemmning í Staples Center á þessum leik. Lakers en nú með 6,5 leikja forskot á Clippers í töflunni en þetta eru tvö efstu liðin í Vestrinu.

Paul George skoraði 31 stig fyrir Los Angeles Clippers, Kawhi Leonard var með 26 stig og Montrezl Harrell skoraði 20 stig.

„Þetta var mjög góð helgi fyrir okkur þar sem við spiluðum við tvö af bestu liðunum, tvö bestu liðin ásamt okkur þegar við skoðum sigurhlutfallið. Við héldum ró okkar allan leikinn,“ sagði LeBron James. Í leiknum á undan þá vann Los Angeles Lakers sigur á  Milwaukee Bucks þar sem James var með 37 stig, 8 fráköst og 7 stoðsendingar.

„Hans besta helgi í Lakers-búningnum held ég. Ég var reyndar ekki hérna í fyrra en í mínum huga vor þetta tveir bestu leikir hans í röð. Hann drottnaði yfir báðum leikjunum og hjálpaði okkur að landa þessum tveimur sigrum,“ sagðo Frank Vogel, þjálfari Los Angeles Lakers.





Devin Booker skoraði 20 af 36 stigum sínum í fyrsta leikhluta þegar Phoenix Suns vann 140-131 sigur á toppliði Milwaukee Bucks sem lék reyndar án Giannis Antetokounmpo sem er meiddur á hné. Antetokounmpo meiddist í tapinu á móti Lakers og mun líka missa af næsta leik. Spánverjinn Ricky Rubio var með þrennu, skoraði 25 sitg, tók 13 fráköst og gaf 13 stoðsendingar.





Dennis Schröder stal boltanum af Kemba Walker og skoraði úr hraðaupphlaupinu 8,5 sekúndum fyrir leikslok þegar Oklahoma City Thunder vann 105-104 sigur á Boston Celtics. Chris Paul var með 28 stig og 7 stoðsendingar fyrir Thunder og Schröder var með 27 stig og 6 stoðsendingar. Gordon Hayward skoraði 24 stig fyrir Celtics liðið.





Pascal Siakam skoraði 11 af 23 stigum sínum á síðustu tveimur og hálfri mínútu leiksins þegar meistarar Toronto Raptors unnu 118-113 sigur á Sacromento Kings. Kyle Lowry var líka frábær í fjórða leikhluta þar sem hann var með 13 af 30 stigum sínum í leiknum. Norman Powell skoraði 31 stig og Serge Ibaka var með 15 stig og 10 fráköst.

Úrslitin í NBA-deildinni í nótt:

Sacramento Kings - Toronto Raptors 113-118

Cleveland Cavaliers - San Antonio Spurs 132-129 (framlengt)

New York Knicks - Detroit Pistons 96-84

Dallas Mavericks - Indiana Pacers 109-112

Houston Rockets - Orlando Magic 106-126

Washington Wizards - Miami Heat 89-100

Boston Celtics - Oklahoma City Thunder 104-105

Phoenix Suns - Milwaukee Bucks 140-131

Los Angeles Clippers - Los Angeles Lakers 103-112

Minnesota Timberwolves - New Orleans Pelicans 107-120

Brooklyn Nets - Chicago Bulls 110-107











NBA

Mest lesið


Fleiri fréttir

Sjá meira


×

Mest lesið