Kennir föður Messi um það að hann komst ekki í burtu frá Barcelona

Hernan Crespo er á því að Lionel Messi væri ekki að spila með Barcelona á þessu tímabili ef umboðsmaður Messi væri ekki líka faðir hans.

Hernan Crespo er argentínsk knattspyrnugoðsögn og aðeins þrír leikmenn hafa skorað fleiri mörk fyrir argentínska landsliðið. Einn af þeim er að sjálfsögðu Lionel Messi og argentínskir fjölmiðlar fengu Crespo til að ræða mál Messi.

Lionel Messi tilkynnti það að hann væri á förum frá Barceloma en hætti síðan við og ætlar nú að klára lokaár samningsins síns. Hernan Crespo gagnrýnir föður Messi fyrir það hvernig málið endaði en það var ljóst á viðtali við Lionel Messi að hann vildi ekki spila áfram með Barcelona.

Jorge Messi, faðir Lionel Messi, er líka umboðsmaður hans. Það var einmitt Jorge Messi sem mætti á fund stjórnenda Barcelona til að fá það í gegn að sonur hans fengi að fara. Útkoman af því var óvænt U-beygja hjá Lionel Messi.

„Þetta er ekki það sama og þegar umboðsmaður er ræða málin. Þetta er faðir hans sem er að ræða við þá. Umboðsmaðurinn mun ekki láta tilfinningasemi eða fjölskyldumál hafa áhrif á sig,“ sagði Hernan Crespo í samtali við TyC Sports í Argentínu.

„Hann hættir ekki að vera faðir hans og í svona kringumstæðum þá þarftu á fagmanni að halda,“ sagði Crespo.

„Ég vil ekki gera lítið úr föður hans en hann hefur ekki sama bakgrunn í þessum máli miðað við aðra umboðsmenn,“ sagði Crespo sem er sannfærður um að reyndur umboðsmaður hefði tekist að koma Messi frá Barcelona.

„Við erum að tala um stjórnendur, samninga og peninga. Hann þarf á einhverjum að halda sem kann betur á slíkar aðstæður,“ sagði Hernan Crespo.

Hernan Crespo lék á sínum tíma með liðum eins og Lazio, Inter, Chelsea og AC Milan. Hann skoraði 35 mörk í 64 landsleikjum fyrir Agrentínu og aðeins Sergio Agüero, Gabriel Batistuta og Lionel Messi hafa skorað fleiri.