Lék fyrri hálfleik með veiruna | Liðsfélagarnir halda til Svíþjóðar

Króatinn Domagoj Vida lék fyrri hálfleikinn í vináttulandsleik við Tyrkland í gær áður en í ljós kom að hann væri með kórónuveiruna.

Vida var tekinn af velli í hálfleik en það mun hafa verið ákveðið fyrir leikinn, sem endaði með 3-3 jafntefli.

Í yfirlýsingu frá króatíska knattspyrnusambandinu segir að í samræmi við reglur verði Vida nú í einangrun í Istanbúl næstu daga. Aðrir í króatíska hópnum haldi nú hins vegar til Svíþjóðar vegna leiks í Þjóðadeildinni á laugardaginn.

Leikmenn og starfslið Króatíu fóru í skimun á mánudaginn þar sem öll sýni greindust neikvæð, en í skimun sem gerð var í gærmorgun reyndist aðeins sýni úr Vida jákvætt. 

Niðurstaða úr sýnatökunni mun ekki hafa legið fyrir fyrr en í hálfleik, eftir að búið var að skipta Vida út af fyrir Filip Uremovic.