Átta milljónir minka á skilgreindum áhættusvæðum þegar verið aflífaðir

Um átta milljónum af þeim ríflega tíu milljónum minka, á skilgreindum áhættusvæðum eitt og tvö í Danmörku, sem til stendur að aflífa vegna nýs afbrigðis kórónuveiru hafa þegar verið teknir af lífi. Þetta hefur danska ríkisútvarpið, DR eftir upplýsingum frá dönsku Dýra- og matvælastofnuninni.

Stökkbreytt afbrigði kórónuveiru kom upp á minkabúum á Jótlandi fyrr í þessum mánuði og ákváðu dönsk stjórnvöld að allir minkar í Danmörku, um sautján milljónir talsins, skyldu aflífaðir til að koma í veg fyrir útbreiðslu veirunnar.

Fyrrnefndar tölur yfir fjölda þeirra minka sem þegar hafa verið aflífaðir ná yfir minkabú sem heyra undir svæði sem skilgreind eru sem áhættusvæði eitt og áhættusvæði tvö. Svæði eitt nær yfir minkabú þar sem fundist hefur kórónuveirusmit eða þar sem grunur er um smit. Svæði tvö nær yfir bú þar sem ekki er grunur um smit en sem eru staðsettir í innan við 7,8 kílómetra radíus frá minkabúum sem eru á svæði eitt.

Svæði þrjú nær til minkabúa sem hvorki eru innan þeirra fjarlægðarmarka né heldur er grunur um að hafi komið upp smit. Ekki liggur nákvæmlega fyrir hversu margir minkar hafa verið aflífaðir á svæði þrjú samkvæmt frétt DR.