Skiptar skoðanir á afnámi einkaleyfa á bóluefnum

Rúmur helmingur aðildarríkja Alþjóðaviðskiptastofnunarinnar hefur lýst yfir stuðningi við tillöguna. Vonast er til þess að með afnámi einkaleyfanna geti fleiri fyrirtæki framleitt bóluefni og selt skammta á lægra verði.

Bandaríkjamenn lýstu yfir stuðningi við hugmyndina á miðvikudagskvöld. Leiðtogar Spánar og Frakklands sögðust styðja hana sömuleiðis fyrir fund leiðtogaráðs ESB í Porto í dag, þó mætti ganga lengra.

„Við fögnum tillögu Bidens um að afnema einkaleyfin en teljum hana ekki ganga nógu langt. Því hefur Spánarstjórn lagt til að Evrópusambandsríkin kalli eftir því að við afnemum bæði einkaleyfin og hröðum á deilingu þekkingar og tækni milli landa,“ sagði Pedro Sanchez, forsætisráðherra Spánar.

Þjóðverjar hafa aftur á móti lagst gegn afnámi einkaleyfa. Jens Spahn heilbrigðisráðherra sagði á blaðamannafundi í dag að einkaleyfin stæðu ekki í vegi fyrir hraðari framleiðslu. „Sérstaklega hvað varðar mRNA-bóluefnin. Þetta er ekki eitthvað sem hægt er að flýta með því að fjölga verksmiðjum sem hafa leyfi til framleiðslunnar.“