Hrinti birni til að bjarga hundi sínum

Atvikið átti sér stað í Bradbury í Kaliforníu á dögunum. Þar var birna á ferð um íbúðahverfi með tvo húna. Þegar birnirnir voru komnir upp á vegg milli tveggja lóða, hlupu þrír hundar fjölskyldu Morinico út á móti björnunum með miklum látum.

Húnarnir hlupu til baka en birnan stóð vörð og hélt hundunum í burtu. Dýrið náði þó taki á vesti sem einn hundur fjölskyldunnar var í og við það stökk Morinico á birnuna og hrinnti henni af veggnum.

Myndband úr öryggisvél heimilisins var birt á TikTok og fór eins og eldur í sinu um internetið. Hailey Morinico hefur verið í fjölmörgum sjónvarpsviðtölum vegna atviksins undanfarna daga.

Hér að neðan má sjá tvö slík viðtöl og myndbandið sem um ræðir.