Man. City vill fá bæði Grealish og Kane í sumar

Pep Guardiola, knattspyrnustjóri Manchester City, vill fá Harry Kane en hann er jafnvel enn spenntari fyrir Grealish ef marka má heimildir ESPN.

Þeir Harry Kane og Jack Grealish verða væntanlega báðir í stóru hlutverki hjá enska landsliðinu á EM í sumar en voru þeir hvor um sig mjög öflugir með liðum sínum á leiktíðinni.

Kane var bæði markahæstur og stoðsendingahæstur í ensku úrvalsdeildinni og Jack Grealish fór fyrir spútnikliði Aston Villa sem stóð sig vonum framar.

Manchester United hefur líka áhuga á Grealish en City menn eru bjartsýnir að hafa betur í því kapphlaupi. Aston Villa vill fá hundrað milljónir punda fyrir leikmanninn en hann er með samning við félagið til 2025.

City þarf að finna leikmann í stað Sergio Aguero og Kane er fyrstur kostur í að koma inn í framlínu liðsins í stað Argentínumannsins. Kane verður ekki ódýr en hann virðist vera búinn að gefa upp vonina að vinna eitthvað með Tottenham liðinu.