Bayernstjarna í hjartaaðgerð

Coman, sem er 25 ára Frakki, kom inn á sem varamaður í 3-0 sigri Bayern gegn Barcelona í Meistaradeild Evrópu á miðvikudagskvöld. Daginn eftir, í gær, fór hann í aðgerðina. Í yfirlýsingu frá Bayern segir að aðgerðin hafi heppnast vel.

„Hann hefur glímt við smávægilegt vandamál með hjartsláttinn. Honum líður virkilega vel og finnur bara smásársauka við sárið. Þegar það gróir byrjar hann smám saman að æfa að fullu. Það ætti ekki að taka meira en 10-14 daga fyrir hann að byrja að æfa aftur af fullum krafti,“ sagði Julian Nagelsmann, þjálfari Bayern, á blaðamannafundi í dag.