Leituðu þriggja ferða­manna við gos­stöðvarnar en fundu tvo aðra í staðinn

Í samtali við fréttastofu segir Davíð Már Björgvinsson, upplýsingafulltrúi Landsbjargar, að þrír ferðamenn sem höfðu villst af gönguleiðinni að gosstöðvunum hefðu sett sig í samband við viðbragðsaðila. Í kjölfarið hafi björgunarsveitarfólk hafist handa við að leita að fólkinu.

Síðan hafi rofað til og ferðamennirnir fundið gönguleiðina af sjálfsdáðum, og gengið að bílastæðinu við upphaf gönguleiðarinnar.

Meðan á leit björgunarfólks stóð rambaði það fram á tvo aðra ferðamenn, sem voru orðnir kaldir og hraktir efst í Langahrygg. Þannig lagði björgunarfólkið af stað í leit að þremur ferðamönnum en hafi þess í stað fundið tvo aðra ferðamenn sem voru aðstoðar þurfi.

Björgunarfólkið aðstoðaði ferðamennina tvo niður og kom þeim til byggða.