Sólvellir taldi að erlendi aðilinn, sem skráður er í Texas í Bandaríkjunum, héldi léninu aðeins út í því skyni að leggja stein í götu fyrirtækisins. Aðilinn hefði engin tengsl við lénið eða starfsemi þess yfir höfuð. Sólvellir höfðu hins vegar í hyggju að nýta lénið í starfsemi sinni og sendu meðal annars tölvupósta á Texasbúann án árangurs. Í kjölfar þess var kvartað til Neytendastofu.
Neytendastofa fjallaði stuttlega um kvörtunina og tók ákvörðun um að vísa málinu frá. Það gerði stofnunin á þeim grundvelli að forgangsraða þurfi málum eftir heildarhagsmunum neytenda. Neytendastofa hafi samkvæmt því brýnni mál til að fjalla um, en eignarhald Texasbúans á léninu.