Gera samning um frekari framleiðslu og segja skilið við Sambandið

Þetta kemur fram í tilkynningu frá 101 Produtions. Samningurinn kveður á um þáttagerð fyrir sjónvarp og áframhaldandi þróun efnis fyrir aðra ljósvakamiðla.

Fimm nýjar seríur

Um fimm nýjar seríur er að ræða og má þar á meðal nefna nýja seríu af raunveruleikaþáttunum Æði sem og nýja leikna seríu en það er fyrsta leikna sjónvarpsserían sem 101 Productions framleiðir.

Í tilkynningunni kemur fram að Stöð 2 og 101 Productions hafi átt í blómlegu samstarfi sem hefur fætt af sér þættina Æði, GYM, Áttavillt, Bibba flýgur, Dagbók urriða, Börn þjóða og nýjustu þáttaröðina, Aðalpersónur, sem nú er í sýningu.

Segja skilið við símafélagið Sambandið

101 Productions er í sameiginlegri eigu Sýnar og 101 Family sf. og var stofnað árið 2018. Fyrirtækið rekur einnig útvarpsstöð og gefur út hlaðvörp undir merkjum Útvarps 101.

Í samningnum felst einnig að Sýn taki alfarið yfir rekstur símafyrirtækisins 101 Sambandsins sem félögin hafa átt samstarf um undanfarin ár. 

„Við tókum þá sameiginlegu ákvörðun um að félagið myndi einbeita sér að menningarstarfsemi og framleiðslu og einfalda þannig reksturinn innanhúss. Þó svo að samstarfið um símareksturinn hafi ekki gengið alveg sem skyldi á flóknum tímum þá skildi hann eftir sig heilmikið af skemmtilegum minningum, ánægðum viðskiptavinum og þetta blómlega samstarf sem við tökum nú næsta skrefið í. Við hjá 101 Productions viljum þakka öllu því fólki sem við kynntumst í Sambandinu og vitum að það verður vel séð um þau áfram," segir Birna Ósk Hansdóttir, framkvæmdastjóri 101 Productions.

Vilja heyra í öllum með góðar hugmyndir

Þróunarstjóri 101 Productions, Jóhann Kristófer Stefánsson, segir mikla gleði og spennu ríkja innan fyrirtækisins og að samningur sem þessi veiti starfsfólki þess byr undir báða vængi í þeirri vegferð að framleiða hágæða íslenskt sjónvarpsefni. 

„Fyrsta leikna serían er bara enn eitt fyrsta skiptið af mörgum upp á síðkastið hjá okkur og við erum með margt spennandi í pípunum. Ég hvet bara alla sem hafa áhuga á einhverskonar fjölmiðlun og eru með skemmtilegar pælingar að heyra í okkur.“

Félögin ætli að eiga í samstarfi um að uppgötva og hlúa að næstu kynslóð íslenskra skemmtikrafta en flestar sjónvarpsseríur sem félögin hafa unnið saman hingað til eiga það sameiginlegt að kynna til leiks nýtt sjónvarpsfólk. Mörg þeirra eiga það einnig sameiginlegt að hafa stigið sín fyrstu skref í fjölmiðlum á bak við hljóðnemann á útvarpsstöðinni Útvarp 101.

Vísir er í eigu Sýnar hf.