Karl­maður á þrí­tugs­aldri hand­tekinn vegna gruns um morð í austur­borginni

Þetta staðfestir Margeir Sveinsson aðstoðaryfirlögregluþjónn hjá miðlægri rannsóknardeild lögreglu í samtali við fréttastofu. Búið er að handtaka karlmann á þrítugsaldri í tengslum við rannsóknina. 

Hann segir að grunur sé um að andlátið hafi borið að með saknæmum hætti. Sá látni er karlmaður á fimmtugsaldri. Margeir getur ekki gefið frekari upplýsingar um málið að svo stöddu. Fram kemur í tilkynningu frá lögreglunni að andlátið hafi átt sér stað um kvöldmatarleytið í dag. Tilkynning hafi borist lögreglu rétt fyrir klukkan 19:30.

Fréttastofa fór á vettvang og þegar þangað var komið var búið að girða götuna af, beggja vegna við húsið, sem grunur er um að morð hafi verið framið í. Lögreglumaður sem fréttastofa náði tali af á vettvangi gat engar upplýsingar gefið um málið en sagði að von væri á tilkynningu bráðlega. Tæknideild lögreglu var á staðnum þegar fréttastofa var þar. RÚV greindi fyrst frá málinu. 

Fréttin var uppfærð klukkan 23:15.