Þetta kemur fram í frétt Viðskiptablaðsins sem birtist í dag. Þar staðfestir Magnús Harðarson forstjóri Kauphallarinnar að hún hafi starfslok Eggerts til skoðunar.
Viðskiptablaðið greindi þá frá því í dag að heimildir blaðsins hermi að Eggerti hafi verið sagt upp störfum og hann fengið þær skýringar frá stjórn Festar að tími væri kominn á breytingar. Sjö ár væri hæfilegur tími á forstjórastóli.
Þá segir í frétt blaðsins að mikil ólga sé innan hluthafahóps félagsins og að þorri tuttugu stærstu hluthafanna hafi fyrst frétt af starfslokum Eggerts þegar Festi sendi um það tilkynningu til Kauphallarinnar.
Fram kom í tilkynningunni að Eggert hafi gert samkomulag um starfslok við Festi. Eggert hafi sagt starfi sínu lausu frá og með 1. ágúst næstkomandi. Reynist það rétt að Eggerti hafi verið sagt upp, en hann ekki sagt upp eins og sagði í tilkynningunni frá Festi, gæti félagið hafa brotið gegn upplýsingaskyldu skráðra félaga á markaði.
Samkvæmt heimildum fréttastofu má rekja starfslok Eggerts til þess að hann hafi staðið þétt við bakið á Vítalíu Lazarevu, sem sakað hefur Þórð Má Jóhannesson, Hreggvið Jónsson og Ara Edwald um að hafa brotið á sér kynferðislega.
Þórður Már og Hreggviður eru hluthafar í Festi og Þórður Már var þar stjórnarformaður þar til í janúar en hann sagði af sér sem stjórnarformaður í kjölfar þess að Vítalía steig fram og sagði frá meintu ofbeldi í hlaðvarpsþættinum Eigin konur.
Segir Eggert einn fárra sem hafi hlustað á hana
Vítalía greindi frá því á Twitter um helgina að Eggert hafi verið einn fárra sem hafi hlustað á hana og rætt við hana og leyft henni að segja sína hlið á málinu. Síðan hefur Vítalía eytt Twitter-aðgangi sínum.
„Einn af þeim fáu mönnum sem talaði við mig án þess að þekkja mig, hlustaði og gaf mér tækifærið á að segja mína hlið þegar ÞMJ var búinn að leggja allt aðra sögu á borðið hjá stjórninni,“ skrifaði Vítalía í tístinu og ýjaði að því að Þórður Már og Hreggviður væru á bak við vistaskipti Eggerts.
„Þetta er spilling og ekkert annað. Ég veit hvernig þessir menn spila og hvert þeir stefna. Þeir halda að þeir séu ósnertanlegir. ÞMJ og HJ eru menn sem munu alltaf bakka hvorn annan upp enda leyndarmálin þeirra ansi mörg. Þetta er ekki búið.“
Samkvæmt heimildum fréttastofu var þessi stuðningur Eggerts við Vítalíu ekki vinsæll innan Festar, þá kannski sérstaklega hjá Þórði Má og Hreggviði, sem hafi unnið að því að steypa Eggerti af forstjórastóli.
Sagði af sér sem stjórnarformaður
Mál Vítaíu komst fyrst í kastljósið í janúar eftir að viðtal Eddu Falak við hana í hlaðvarpinu Eigin konur birtist. Þar lýsti Vítalía því að hafa orðið fyrir ofbeldi af hendi þriggja eldri karlmanna í sumarbústaðarferð, sem hún hafði mætt í til að hitta þáverandi ástmann sinn, sem samkvæmt heimildum fréttastofu er einkaþjálfarinn Arnar Grant.
Í kjölfarið var greint frá því að Ari Edwald, þáverandi framkvæmdastjóri Ísey útflutnings, hefði stigið til hliðar úr stjórn fyrirtækisins. Strax sama dag steig Hreggviður Jónsson, þá stjórnarformaður og aðaleigandi Veritas Capital, úr stjórn þess og stjórnum tengdra fyrirtækja. Hreggviður sagði í yfirlýsingu sem hann sendi út að hann harmaði að hafa ekki stigið úr aðstæðunum sem Vítalía lýsti og honum þætti þungbært að heyra um hennar reynslu. Hann teldi sig þó ekki hafa gerst brotlegan við lög.
Þórður Már sagði sig samdægurs úr stjórn Festar vegna ásakananna og Arnar Grant hætti tímabundið störfum hjá World Class, þar sem hann starfaði sem einkaþjálfari í verktakavinnu.
Þá lýsti Vítalía því yfir í mars að hún hyggðist kæra Þórð Má, Ara og Hreggvið til lögreglu fyrir kynferðisbrot. Hún hafði þá bókað tíma hjá kærumóttöku kynferðisbrota hjá lögreglu en fréttastofa hefur ekki vitneskju um hvort hún sé búin að leggja fram kæru á hendur þeim.
