Bíó og sjónvarp

Ný leikin mynd um Herkúles frá Disney

Magnús Jochum Pálsson skrifar
Málverk frá 18. öld af því þegar Herkúles var brenndur á báli á toppi Etnu. Spurning hvort það verði fjallað um þau endalok hans í nýjustu myndinni.
Málverk frá 18. öld af því þegar Herkúles var brenndur á báli á toppi Etnu. Spurning hvort það verði fjallað um þau endalok hans í nýjustu myndinni. Getty

Guy Ritchie mun leikstýra nýrri leikinni mynd um Herkúles fyrir Disney sem á að byggja á söguþræði teiknimyndarinnar um gríska goðið frá 1997.

Kvikmyndin verður framleidd af framleiðslufyrirtækinu AGBO sem er rekið af bræðrunum Joe og Anthony Russo, en þeir eru best þekktir fyrir að leikstýra Marvel-myndinni Avengers: Endgame. Samkvæmt miðlum vestanhafs leitar stúdíóið nú að handritshöfundum.

Ritchie starfaði síðast fyrir Disney árið 2019 þegar hann leikstýrði myndinni Aladdin með Will Smith í aðalhlutverki. Söguþráður hennar var einnig byggður á Disney-teiknimynd frá tíunda áratugnum. Sú mynd skilaði meira en milljarði amerískra dollara í tekjur og vilja Disney væntanlega endurtaka leikinn nema í þetta skiptið með grískri hetju.

Þessi nýja mynd mun bætast í hóp fjölmargra mynda um Herkúles en ýmsar stjörnur hafa leikið gríska goðið á hvíta tjaldinu, þar á meðal Arnold Schwarzenegger og Lou Ferrigno. Síðastur til að leika kappann var Dwayne Johnson sem lék hann árið 2014 en það árið komu út tvær leiknar myndir um kappann.

Disney Bíó og sjónvarp Bandaríkin Grikkland


Mest lesið


Fleiri fréttir

Sjá meira


×

Mest lesið


Tarot dagsins

Dragðu spil og sjáðu hvaða spádóm það geymir.