Ferdinand: Ron­aldo verður bál­reiður með bekkjar­setu

Erik ten Hag, knattspyrnustjóri Manchester United, hefur byrjað síðustu tvo leiki liðsins með Ronaldo á bekknum en United vann báða leikina. Framtíð Ronaldo hjá Manchester United hefur verið mikið umræðunni í sumar en Ferdinand segir að sinn fyrrum samherji muni ekki sætta sig við bekkjarsetu hjá United í vetur.

„Hvort sem hann verður áfram eða ekki, það veit enginn okkar. Þekkjandi Ronaldo þá veit ég fyrir víst að hann er bálreiður akkúrat núna,“ sagði Ferdinand í Vibe with Five hlaðvarpinu sínu í gærdag. 

Ferdinand segir enn fremur að sumir leikmenn sætti sig kannski við að sinna hlutverki varamanns en Ronaldo taki það alls ekki í mál.

„Það skiptir engu máli hver er að byrja á undan honum. Þú nærð ekki þessum hæðum sem hann hefur náð á sínum ferli með því að vera einhver sem samþykkir það að vera á varamannabekknum hjá liði sem er ekki einu sinni að spila í Meistaradeildinni.“

Ten Hag spilar mikinn pressubolta og einhverjir hafa velt því fyrir sér hvort Ronaldo passi inn í leikstíl knattspyrnustjórans.

„Hvað sem hver segir um hlaupagetu, pressu o.s.frv. þá mun hann samt sitja á bekknum og hugsa um þau 24 mörk sem hann skoraði á síðasta tímabili. Það erfiðasta í fótbolta er að skora mörk og hann gerði það 24 sinnum á síðasta ári,“ sagði Rio Ferdinand sem býst þó ekki við því að Ronaldo muni yfirgefa Manchester United í sumar, einfaldlega vegna þess að ekkert annað lið sé tilbúið að borga launakröfur hans.