Ráðin nýr verkefnastjóri dagskrárgerðar í Hörpu

Þetta kemur fram í tilkynningu þar sem fram kemur að hún hafi þegar tekið til starfa og að um sé að ræða tímabundna stöðu til eins árs.

Ása Berglind lauk meistaraprófi í menningarstjórnun með áherslu á nýsköpun og frumkvöðlastarf frá Háskólanum á Bifröst árið 2021. Hún lauk BA gráðu frá tónlistardeild Listaháskóla Íslands árið 2007 og lærði einnig listkennslu á meistarastigi í sama skóla.

Haft er eftir Svanhildi Konráðsdóttur, forstjóra Hörpu, að ráðning verkefnastjóra dagskrárgerðar sé mikilvægur liður í innleiðingu á dagskrárstefnu Hörpu sem styðji við menningarlegt og samfélagslegt hlutverk hússins. „Ása Berglind býr yfir víðtækri reynslu úr menningar- og tónlistarlífinu á Íslandi. Markmið okkar er að auka fjölbreytni í viðburðahaldi í Hörpu með áherslu á hágæða alþjóðlega tónlistarviðburði, frumsköpun og samstarf við fjölbreyttan hóp stofnana, hátíða og einstaklinga“, segir Svanhildur.

Nýtt dagskrárráð Hörpu

Þá segir í tilkynningunni að stjórn Hörpu hafi jafnframt skipað dagskrárráð til tveggja ára í kjölfar tilnefninga frá fagfélögum tónlistariðnaðarins. „Ráðið skipa Ásmundur Jónsson, Elísabet Indra Ragnarsdóttir, Guðni Tómasson og Sóley Stefánsdóttir. Hlutverk ráðsins er að styðja við mikilvæga innleiðingu og framkvæmd nýrrar dagskrárstefnu Hörpu þannig að húsið uppfylli sem best menningarlegt hlutverk sitt miðað við þann stakk sem því er sniðinn.