Stofnanir fóru alla leið með styttingu vinnu­tímans en fylgdu ekki lykil­mark­miðum

Í kjölfar kjarasamninga 2019-2020 hafa stofnanir ríkisins haft heimild til að gera breytingar á skipulagi vinnutíma og stytta vinnuvikuna úr 40 stundum í allt að 36 virkar vinnustundir. Helsta markmiðið var sagt umbætur í starfsemi stofnana en breytingarnar áttu ekki að draga úr skilvirkni og gæðum þjónustu, né leiða til breytinga á launum eða launakostnaði. Um er að ræða tilraunaverkefni sem meta á fyrir lok samningstímans.

Rætt var við Bjarna Benediktsson fjármálaráðherra um skýrsluna í dag. Hann sagði meðal annars að farið yrði í að brýna fyrir stofnunum að viðhalda skilvirkni og gæðum samhliða styttingu vinnutímans.

Í skýrslu KPMG segir að flestar stofnanir telji að heimsfaraldur kórónuveiru hafi hrint af stað hröðum breytingum og nýjum viðhorfum í menningu og starfsemi hins opinbera. Innleiðing vinnutímabreytinga og hámarksstytting hafi þar af leiðandi verið töluvert auðveldari þar sem stofnanir voru knúnar til að breyta mörgu hjá sér t.d. með breyttri fundarmenningu, fjarfundum, fjarvinnu og því hvernig starfsumhverfi er skilgreint.

Starfsfólk stofnana er almennt ánægt með þær breytingar sem gerðar hafa verið með innleiðingu betri vinnutíma í dagvinnu. Þá hefur stytting vinnuvikunnar ekki hækkað launakostnað þeirra 30 stofnana sem stöðumatið nær til. Einnig er þó bent á ýmis tækifæri til úrbóta og betri framkvæmdar verkefnisins.

Þannig er nefnt að meirihluti stofnana hafi farið strax í hámarksstyttingu vinnutímans án þess að fylgt væri eftir markmiðum um gagnkvæman ávinning, skilvirkni og gæði þjónustu. Í ríkiskerfinu skorti árangurs- og framleiðnimælingar og almennt þurfi að skerpa á markmiðasetningu og auka yfirsýn stjórnenda á mælikvörðum og gæðum þjónustu og innleiða verklag í því sambandi.

Þá er það mat KPMG að stofnanir séu margar hverjar hvorki af þeirri stærð, né hafi mannauð og skipulag til að takast á við jafn viðamiklar breytingar og verkefnið betri vinnutími gerir kröfur um. Knappur undirbúningstími hafi ekki hjálpað til og stofnanir ekki náð fyllilega að knýja fram umbætur áður en vinnutímabreytingarnar komu til framkvæmda.

Í skýrslunni eru eftirfarandi tækifæri til umbóta dregin fram:

• bætt nýting verkfæra um opinber fjármál
• aukinn stuðningur við stofnanir
• efld árangursstjórnun og eftirfylgni ráðuneyta
• samstillt rekstrarmódel með aukinni skilvirkni og samræmingu í stofnanakerfinu
• aukin áhersla á þjónustu og virðisaukandi starfsemi

Fjármála- og efnahagsráðuneytið segist ætla að nýta niðurstöður stöðumatsins við næstu kjarasamningsgerð ásamt því að leggja áfram á það áherslu að styrkja stofnanakerfið og gera það burðugra til þess að sinna sínum kjarnaverkefnum.

• Skýrsla_KPMGPDF1.1MB
  Sækja skjal