Auður Hrefna fylgist með á­byrgum við­skipta­háttum á Ís­landi

Í tilkynningu segir að ráðning svæðisstjóra fyrir Ísland sé liður í því að auka áherslu á starfsemi UN Global Compact hérlendis, en íslensk fyrirtæki hafa tekið þátt í starfi UNGC frá árinu 2006.

„Samtök atvinnulífsins hafa verið tengiliður UN Global Compact hér á landi síðustu ár og unnið metnaðarfullt og einfaldlega frábært starf. Á þessum tíma hafa fyrirtæki sýnt mikinn áhuga á starfi samtakanna og hefur þátttakendum fjölgað jafnt og þétt. Í dag eru 28 íslensk fyrirtæki aðilar að Global Compact,“ segir Auður Hrefna.

Með aukinni áherslu á starfsemi UNGC á Íslandi opnist fjölmörg tækifæri fyrir íslenskt atvinnulíf. 

„UN Global Compact er stærsta sjálfbærniframtak í heimi og öflug leið til að sameina fyrirtæki í því að stunda ábyrg viðskipti og leggja sitt að mörkum í átt að sjálfbærum heimi. Það er tímabært að íslensk fyrirtæki geti nýtt til fulls þekkingu, gögn og aðferðir sem samtökin hafa þróað á undanförnum árum. Hér má m.a. nefna akademíu UN Global Compact, ýmsa viðburði og þá er alþjóðlegt tengslanet samtakanna afar gagnlegt.“

Heimurinn standi á tímamótum og án aðkomu atvinnulífs að markmiðum um sjálfbærni verði litlum árangri náð. 

„Við verðum að gera þetta saman og UN Global Compact er svo sannarlega góður vettvangur til að skerpa á sjálfbærnivegferð fyrirtækja,“ segir Auður Hrefna.