ÍSÍ og ÍF mótmæla mögulegri þátttöku Rússa og Hvít-Rússa

Sindri Sverrisson skrifar 7. febrúar 2023 12:13

Sumarólympíuleikarnir fóru síðast fram í Tókýó 2021, ári síðar en til stóð, og fara næst fram í París 2024. Getty/Matthias Hangst

Íþrótta- og Ólympíusamband Íslands, og Íþróttasamband fatlaðra, hafa ásamt sams konar samböndum á Norðurlöndum sent frá sér yfirlýsingu í tengslum við umræðu um mögulega endurkomu rússnesks íþróttafólks til keppni í alþjóðlegum mótum.

Í yfirlýsingunni er ítrekuð skýr afstaða sambandanna þess efnis að ekki skuli opna fyrir þátttöku íþróttafólks og embættismanna frá Rússlandi og Hvíta-Rússlandi í alþjóðlegu íþróttastarfi. Samböndin lýsa yfir stuðningi við úkraínsku þjóðina og ítreka kröfuna um frið.

Rússneskt íþróttafólk var bannað frá alþjóðlegum keppnum í kjölfar innrásarinnar í Úkraínu í fyrra. Alþjóðaólympíunefndin, IOC, virtist hins vegar fyrir tveimur vikum hafa í hyggju að gefa á ný grænt ljós fyrir Rússa og Hvít-Rússa, svo að keppendur þaðan gætu keppt að því að komast inn á Ólympíuleikana í París á næsta ári.

Þetta vakti hörð viðbrögð og Kamil Bortniczuk, íþrótta- og ferðamálaráðherra Póllands, sagði að allt að fjörutíu þjóðir kæmu til með að sniðganga Ólympíuleikana ef að Rússum og Hvít-Rússum yrði leyft að keppa.

IOC sendi svo frá sér yfirlýsingu í síðustu viku þar sem fullyrt var að áfram yrði viðhaldið þeim refsingum sem ákveðnar voru fyrir þjóðirnar tvær, og að um annað yrði ekki hægt að semja.

Yfirlýsing ÍSÍ, ÍF og annarra sambanda Norðurlandanna er í takti við þá yfirlýsingu og er hægt að lesa hana hér að neðan.

Yfirlýsing frá norrænum Ólympíunefndum, íþróttasamböndum og íþróttasamböndum fatlaðra vegna stríðsins í Úkraínu:

1. Staðan í stríðinu í Úkraínu hefur ekki breyst.

2. Þess vegna stöndum við fast við þá afstöðu okkar, að opna ekki fyrir þátttöku íþróttafólks og embættismanna frá Rússlandi og Belarús í alþjóðlegu íþróttastarfi.

3. Nú er ekki rétti tíminn til að huga að endurkomu þeirra; það er afstaða okkar.

4. Við, Ólympíunefndir, íþróttasambönd og íþróttasambönd fatlaðra á Norðurlöndum, notum þetta tækifæri til að ítreka staðfastan stuðning okkar enn og aftur við úkraínsku þjóðina og kröfuna um frið.

5. Við, Ólympíunefndir, íþróttasambönd og íþróttasambönd fatlaðra á Norðurlöndum munum vinna saman og í nánu samráði við viðeigandi hagsmunaaðila til að meta stöðuna og fylgjast náið með ástandinu.

Þessi yfirlýsing hefur verið samþykkt af forsetum/formönnum eftirfarandi samtaka:

Danmörk

Danish Olympic Committee and Confederation of Sports, Hans Natorp

Danish Paralympic Committee, John Petersson

Finnland

Finnish Olympic Committee, Jan Vapaavuori

Finnish Paralympic Committee, Sari Rautio

Ísland

Íþrótta- og Ólympíusamband Íslands, Lárus Blöndal

Íþróttasamband fatlaðra, Þórður Árni Hjaltested

Noregur

Norwegian Olympic and Paralympic Committee and Confederation of Sports, Berit Kjøll

Svíþjóð

Swedish Olympic Committee, Acting President Anders Larsson

Swedish Confederation of Sports, Björn Eriksson

Swedish Paralympic Committee, Åsa Llinares Norlin

Grænland

The Sports Confederation of Greenland, Nuka Kleemann

Færeyjar

Faroese Confederation of Sports and Olympic Committee, Elin Heðinsdóttir Joensen

Faroe Islands Paralympic Committee, Petur Elias Petersen

Álandseyjar

Åland Islands Sports Federation, Anders Ingves

Ólympíuleikar 2024 í París Innrás Rússa í Úkraínu ÍSÍ Ólympíumót fatlaðra

Mest lesið

Fleiri fréttir