Í toppstandi þrátt fyrir að úða í sig pasta á Ítalíu

„Það er bara æðislegt. Okkur fjölskyldunni líður rosalega vel. Þetta er aðeins öðruvísi, rólegra og minna stress utan körfuboltans. Mér líður mjög vel þarna, og okkur,“ segir Kristinn um lífið á Ítalíu en hann flutti þangað út í sumar eftir að hafa leikið með Val hér heima undanfarin ár.

Kristinn virkar í toppstandi. Aðspurður um það hvort hann hafi tónað sig vel í atvinnumennskunni ytra segir hann:

„Jú, maður er meira að æfa, það eru fleiri æfingar og meiri lyftingarnar en maður er vanur. Maður er kannski búinn að tónast aðeins,“ segir Kristinn léttur.

Menn liggja þá ekkert í pastanu þarna úti?

„Jú, jú, maður gerir það líka. Það kannski hefur engin áhrif þegar maður æfir svona mikið.“

Verkefni kvöldsins er sterkt lið Litáen. Litáar unnu Breta með eins stigs mun og töpuðu svo með eins stigs mun fyrir Ítölum í síðasta glugga. Öll lið í riðlinum hafa unnið einn og tapað einum hingað til og má búast við hörkuleik.

„Við vitum að Litáen er þvílík körfuboltaþjóð. Þeir eru geggjaðir og með hávaxna leikmenn í öllum stöðum. Þeir eru skipulagðir og vita hvernig þeir sækja körfur og spila vörn. En við vitum það líka. Þetta verður geggjaður leikur,“ segir Kristinn.

Hann missti af síðasta glugga liðsins en líkt og þeir leikmenn sem spiluðu heimaleikinn við Breta í nóvember var skýrt að okkar menn voru ekki upp á sitt besta. Til stendur að svara fyrir tapið fyrir Bretum og ná heimasigri.

„Maður horfði á síðasta heimaleik í sjónvarpinu og skynjaði stemningsleysi og það hafi verið þungt yfir öllu. Það er ákall á stuðningsfólk að láta heyra í sér og búa til þessa stemningu sem við höfum verið þekktir fyrir í þessari höll,“ segir Kristinn.

Viðtalið má sjá í spilaranum þar sem gengur á ýmsu á bakvið Kristinn á meðan á því stendur.