Deildu um leigu á gisti­heimili vegna brúð­kaups í Svarfaðar­dal

Rekstrarfélagið ákvað að leita til dómstóla þar sem það vildi meina að skuldbindandi samningur hafi verið gerður um að gestir mannsins myndi gista í öllum gistirýmum gistiheimilis bæði föstudag og laugardag umrædda helgi gegn greiðslu ákveðinnar fjárhæðar.

Maðurinn hafi hins vegar einungis greitt hluta hennar, þó að hann teldi sig hafa greitt fyrir leiguna að fullu þar sem hann hafi gert rekstraraðilum ljóst að ekki yrði þörf á að nýta öll gistiherbergin og því ætti að greiða lægri upphæð. Hann vildi sömuleiðis meina að hann ætti rétt á afslætti eða skaðabótum vegna annmarka á þjónustu á gistiheimilinu.

Upphaflegt verðtilboð, fyrir leigu á öllu gistiheimilinu, nam 718 þúsund krónum. Fram kemur í dómi að rekstraraðila hafi mátt vera ljóst að tilboðinu hafi verið hafnað af manninum þar sem hann hafi tilkynnt rekstraraðilum þegar nær dró að ekki væri þörf á að nýta öll herbergin.

Dómari taldi hins vegar rétt að miða við upphaflegt verðtilboð, að frádregnum um 56 þúsund krónum sem rekstrarfélagið hafi fengið vegna útleigu herbergja til annarra en brúðkaupsgesta.

Þurfti að gista á Dalvík vegna plássleysis

Varðandi kröfu mannsins um að hann ætti rétt á bótum eða afslætti vegna vanefnda kemur fram að tveir brúðkaupsgesta hafi ekki fengið þau herbergi sem þeim hafi verið ætlað. 

Í öðru tilvikinu hafi starfsmaður gistiheimilisins fyrirvaralaust látið færa farangur brúðkaupsgesta sem þau höfðu komið sér fyrir í og yfir í minna herbergi til að rýma fyrir einstaklingum utan gestahóps mannsins. Þannig hafi einn í fjölskyldunni þurft að gista á dýnu á gólfinu.

Þá hafi annar brúðkaupsgesta misst herbergi sitt vegna mistaka í bókunum starfsmanna gistiheimilisins og neyðst til að gista á Dalvík vegna plássleysis á Húsabakka.

120 þúsund króna afsláttur en 250 þúsund í málskostnað

Dómari féllst á að aðstæður á gistiheimilinu hafi ekki verið forsvaranlegar eða í samræmi við það sem maðurinn mátti vænta er hann gekk til samninga. Dómari taldi því manninn eiga rétt á 120 þúsund króna afslætti.

Niðurstaða dómara var því sú að maðurinn ætti að greiða 541.946 krónur, að frádreginni innborgun sem gerð var í lok september síðastliðinn, upp á 438.639 krónur. Manninum var hins vegar gert að greiða 250 þúsund krónur í málskostnað.