„Mér finnst við geggjaðir og ég dýrka þessa gaura“

„Mér fannst þetta ekki vera neitt rán. Við skoruðum einu marki meira en Afturelding og unnum leikinn,“ sagði Ásgeir Örn Hallgrímsson, þjálfari Hauka, eftir ótrúlegan sigur.

Haukar voru fimm mörkum undir í hálfleik. Ásgeir var afar ánægður með hvernig Haukar náðu að koma til baka og vinna í framlengingu.

„Auðvitað var ég mjög ósáttur með mína menn í fyrri hálfleik þar sem við áttum skelfilegan hálfleik og strákarnir fengu að heyra það. En við náðum að snúa þessu við og sýndum karakter og seiglu. Ég er ótrúlega stoltur af mínu liði.“

Afturelding var fimm mörkum yfir þegar tæplega fimm mínútur voru eftir en á ótrúlegan hátt náðu Haukar að jafna og leikurinn fór í framlengingu.

„Við vorum búnir að þreyta þá og vorum klárir í lokin sem heppnaðist í dag.“

Haukar byrjuðu framlenginguna tveimur fleiri og með boltann í sókn sem var afar hentugt þar sem gestirnir náðu frumkvæðinu.

„Við unnum hlutkestið og byrjuðum með boltann. Ég sá ekki hvað gerðist þarna í æsingnum en við nýttum það vel og náðum frumkvæðinu í framlengingunni.“

Ásgeir endaði á að hrósa sínu liði þar sem hann var ánægður með karakterinn að klára leikinn í framlengingunni.

„Ég er með alvöru karaktera í mínu liði og við höfum ekkert alltaf verið frábærir í vetur. Við erum að koma núna upp og sýnum alvöru gæði og seiglu. Mér finnst við geggjaðir og ég dýrka þessa gaura,“ sagði Ásgeir Örn Hallgrímsson að lokum.