Húrra lokað: „Reykja­vík er að verða ömur­lega leiðin­leg borg“

„Staðurinn er lokaður eins og staðan er núna. Það eru búnar að vera þreifingar við hús­eig­endur en stað­reyndin er sú að leigan er of há og það er ekki hægt að láta þetta ganga upp eins og þetta er núna,“ segir Þor­steinn Stephen­sen, eig­andi tón­leika­staðarins Húrra, í sam­tali við Vísi.

Auð­veldara að sjá ís­lenska tón­listar­menn í Ber­lín

Fjöl­lista­dísin og fjöl­miðla­konan Margrét Erla Maack vekur at­hygli á lokun staðarins í færslu á sam­fé­lags­miðlinum Face­book. Hún segir að á sama tíma og Egill Ólafs­son frændi sinn væri út­nefndur borgar­listar­maður Reykja­víkur fækki tón­listar­stöðum stöðugt.

„Tón­listin og menningin er það sem gerir okkur að borg fyrir fólk. Tón­listin laðar ferða­menn til borgarinnar. Núna er staðan sú að það eru meiri líkur á að sjá ís­lenska tón­listar­menn koma fram í Ber­lín en í Reykja­vík.“

Margrét segist hafa verið svo heppin að hafa slitið djamms­skónum í Tón­leika-Reykja­vík þegar tón­leika­staðir líkt og Grand­rokk, Faktorý, Gaukurinn, Gamli Gaukurinn og Sódóma hafi verið heimili slíkra við­burða í borginni.

„Lifandi tón­listar­flutningur er í dag orðin helsta tekju­lind tón­listar­manna, þar sem plötu­sala hefur dregist saman. Og þetta er meeeeega­hark þar sem svo fáir tón­leika­staðir eru í borginni,“ skrifar Margrét sem bætir því við að hún öfundi Akur­eyringa af því að eiga tón­leika­staðinn Græna hattinn.

Vill halda Húrra gangandi

Eig­andi hús­næðisins að Tryggva­götu er fast­eigna­fé­lagið Eik. Í svörum til Vísis vegna málsins segja for­svars­menn fé­lagsins að þeir séu bundnir trúnaðar­skyldu gagn­vart leigu­aðilum. Fé­lagið tjái sig ekki um það sem fari sín og leig­endum á milli, hvort sem varði leigu­samning eða annan á­greining.

Þor­steinn segir þó að Eik hafi tekið vel í sjónar­mið sín. Við­ræðum væri þó ekki lokið og staðurinn því enn lokaður og ó­víst væri hvort hann verði opnaður aftur jafnvel þótt samningar næðust.

„Ég hef á­huga á að halda honum gangandi en hann þarf að standa undir sér og gerir það ekki eins og staðan er núna,“ segir Þor­steinn en staðurinn var opnaður aftur í nú­verandi mynd fyrir tveimur árum síðan árið 2021.

„Við höfum reynt að binda þannig um hnútana að þetta geti staðið undir sér en á­standið að undan­förnu hefur gert þetta gríðar­lega erfitt. Það hafa verið rosa­lega miklar hækkanir á öllum sviðum, hvort sem það eru vöru­inn­kaup, laun eða leigan, þannig að þetta hefur bara verið mjög erfitt. Við vonum hins vegar það besta, það er ekki öll von úti enn.“

Deilir á­hyggjum af tón­list í Reykja­vík

Þor­steinn tekur undir með Margréti Erlu. Hann segist hafa veru­legar á­hyggjur af fækkun tón­leika­staða í borginni.

„Reykja­vík er að verða alveg ömur­lega leiðin­leg borg. Það eina sem gengur upp eru túr­ista­staðir og það hækkar leiguna hjá öllum og mið­bæjar­flóran er að vera mjög eiins­leit þó að stöðum hafi fjölgað.“