Hagnaður Regins jókst um 66 prósent

Þetta kemur fram í tilkynningu þar sem segir að endurfjármögnun félagsins sé lokið til ársins 2025. Rekstrartekjur Regins námu 6,7 milljörðum króna og er um að ræða 900 milljón króna aukningu á milli ára. Leigutekjur félagsins hækka um 16,5 prósent frá fyrra ári.

„Reksturinn gengur vel og er yfir áætlun á fyrstu sex mánuðum ársins og við sjáum fram á að hann gangi áfram vel á seinni helmingi ársins. Í ljósi þess er tekjuspá hækkuð fyrir árið í heild um 200 milljónir króna og jafnframt er gert ráð fyrir 200 milljóna króna hærri EBITDA á árinu,“ er haft eftir Halldóri Benjamín Þorbergssyni, forstjóra Regins í uppgjörstilkynningu.

„Það er mitt mat að sú fjárfesting sem átt hefur sér stað í lykilkjörnum Regins sé að skila sér í sterku uppgjöri. Þá er komið að vatnaskilum í umbreytingu fasteignasafns Regins eftir tímabil mikilla fjárfestinga sem félagið uppsker nú í formi aukinnar eftirspurnar og raunaukningar leigutekna,“ segir Halldór. 

„Vaxandi umsvif í ferðaþjónustu höfðu jákvæð áhrif á rekstur félagsins á fyrri helmingi ársins, góður gangur var í hagkerfinu og vanskil í lágmarki. Þá er tekjugrunnur Regins afar sterkur en 45 prósent af leigutekjum koma nú frá opinberum aðilum og skráðum fyrirtækjum sem felur í sér lága mótaðilaáhættu fyrir félagið.“