Keppa við Evrópubúa í iðn- og verkgreinum

Euroskills veðrur sett með opnunarhátíð í kvöld og hefjast leikar svo á morgun. Þeir standa yfir fram á föstudag og verður lokaathöfn og verðlaunaafhending haldin á laugardaginn, 9. september.

Á síðasta Evrópumóti unnu Íslendingar til silfurverðlauna í rafeindavirkjun en það mót var haldið í Búdapest í Ungverjalandi.

Þeir sem keppa nú fyrir Íslandshönd báru sigur úr býtum á Íslandsmóti iðn- og verkgreina sem haldið var í Laugardalshöll í mars. Alls keppa um sex hundruð manns frá 32 ríkjum í 42 greinum í Gdanks í ár.

„Að taka þátt í Euroskills er mjög mikilvægt fyrir framþróun í iðnaði og ekki síður fyrir iðn -og verknám á Íslandi,“ segir Georg Páll Skúlason, formaður Verkiðnar eða Skills Iceland eins og samtökin heita á alþjóðavettvangi, í tilkynningu.

Euroskills er haldin af WorldSkills Europe sem er hluti af alþjóðlegu WorldSkills hreyfingunni og hefur það að markmiði að kynna iðn- og verknám og möguleika þess.

„Samtökin vinna markvisst með stjórnvöldum og iðnaði til að undirbúa samfélagið undir störf framtíðarinnar. Hvert þátttökuland keppist um að þróa færni sína í hverri grein og þátttaka í Euroskills stuðlar einnig að öflugri starfsþróun þeirra iðn- og verkgreinakennara sem taka þátt í þjálfun okkar efnilegu fulltrúa sem keppa fyrir Íslands hönd,“ segir Georg Páll.

Sigurður Borgar Ólafsson er liðsstjóri íslenska landsliðshópsins, en hann er útskrifaður framreiðslumaður og tók þátt í síðasta Euroskills sem fram fór í Búdapest í Ungverjalandi árið 2018.

„Það er mikið stuð í hópnum og mikill spenningur að hefja leika á Euroskills hér í Gdansk. Þetta er mjög öflugur hópur, enda best í sínu fagi á Íslandi eftir að hafa orðið Íslandsmeistarar í sinni iðn- og verkgrein. Það er ekki mikilvægast að landa gullverðlaunum á Euroskills, heldur mikið frekar að vera ánægður og líða vel með að taka þátt. Koma síðan heim til Íslands með mikla reynslu og gott veganesti sem hægt er að miðla áfram,“ segir Sigurður Borgar.

Hópurinn:

Bakaraiðn - Finnur Guðberg Ívarsson, Hótel- og matvælaskólinn.

Framreiðsla - Finnur Gauti Vilhelmsson, Hótel- og matvælaskólinn.

Grafísk miðlun - Olivier Piotr Lis, Tækniskólinn.

Hársnyrtiiðn - Irena Fönn Clemmensen, Verkmenntaskólinn á Akureyri.

Iðnaðarstýringar - Benedikt Máni Finnsson, Tækniskólinn.

Kjötiðn - Bríet Berndsen Ingvadóttir, Hótel- og matvælaskólinn.

Matreiðsla - Hinrik Örn Halldórsson, Hótel- og matvælaskólinn.

Pípulagnir - Kristófer Daði Kárason, Tækniskólinn.

Rafeindavirkjun - Hlynur Karlsson, Tækniskólinn.

Rafvirkjun - Przemyslaw Patryk Slota, Verkmenntaskóli Austurlands.

Trésmíði – Van Huy Nguyen, Tækniskólinn.