Hvíta húsið segir fjár­muni og tíma á þrotum

Þetta kemur fram í erindi fjárlagaskrifstofu Hvíta hússins til þingsins, þar sem það er ítrekað að án aðgerða af hálfu þingsins muni Bandaríkjamenn ekki geta séð Úkraínumönnum fyrir fleiri vopnum og búnaði á nýju ári.

Meðal Repúblikana gætir aukinnar andstöðu við frekari fjárútlát vegna Úkraínu og þingið hefur ekki enn samþykkt 100 milljarða dala viðbótarframlag vegna Úkraínu sem Hvíta húsið lagði fram tillögu að í október.

Talsmenn Hvíta hússins segja útkomuna á vígvellinum í Úkraínu í húfi; að hætta aðstoð gæti greitt fyrir sigri Rússlands, sem væri ógn við þjóðaröryggi Bandaríkjanna. Í erindinu segir að þetta sé ekki vandamál næsta árs, þingið verði að grípa til ráðstafana núna.

Mike Johnson, Repúblikani og forseti fulltrúadeildarinnar, sagði í síðustu viku að hann væri sannfærður um að frekari aðstoð til handa bæði Úkraínu og Ísrael yrði samþykkt en sagði um að ræða aðskilin mál.

Hann sagði ómögulegt að leyfa Vladimir Pútin Rússlandsforseta að „þramma yfir Evrópu“ en Repúblikanar vilja skilyrða áframhaldandi stuðning við Úkraínu við ákveðnar breytingar á landamærastefnu Bandaríkjanna, sem Demókratar hafa verið tregir til að samþykkja.