Flottustu fermingartrendin hjá Galleri 17 í sannkallaðri „fashion“töku

NTC 22. febrúar 2024 08:45

„Við ákváðum að breyta um stefnu og fara í meira „fashion” töku í ár. Hingað til höfum við fókusað á stílhreinar og tímalausar fermingartökur en í ár ákváðum við að leika okkur aðeins meira með fötin og hafa þetta lifandi og skemmtilegt,“ segir Tania Lind Fodilsdóttir, markaðsstjóri NTC.

Galleri 17 hóaði saman fjórtán hressum fermingarkrökkum og fór myndatakan fram á veitingastaðnum Önnu Jónu. Afraksturinn eru glæsilegar myndir af krökkunum sem sjá má hér fyrir neðan.

„Þetta var mjög skemmtilegt og vel heppnað, myndatakan gekk ótrúlega vel,“ segir Tania.

Klassík í bland við óhefðbundið

„Við kaupum alltaf inn þessi hefðbundnu fermingarföt, hvítir kjólar og jakkaföt. Með árunum hefur eftirspurnin breyst og eru fermingarkrakkar að sækjast meir og meir í óhefðbundin fermingarföt eins og föt frá Samsøe Samsøe, Carhartt og Neo Noir.

Í fyrra vorum við að sjá meira af óhefðbundnum fermingarfötum en í ár sjáum við að þessi klassísku fermingarföt, hvítir kjólar við hælaskó og jakkaföt við strigaskó, eru aftur orðin mjög vinsæl meðal fermingakrakka.“

Helstu trendin í ár?

„Fyrir stelpurnar erum við að sjá mikið af loðfeldum í allskonar litum. Það er mjög skemmtilegt trend þar sem svona feldir geta poppað upp fermingardressin alveg ótrúlega. Svo eru fallegar spangir og perluspennur alltaf vinsælir fylgihlutir hjá stelpunum.

Hjá strákunum erum við að sjá minna af bindum og slaufum en meira um vasaklúta – það er meira um töffaraskap hjá strákunum.“

Strigaskór voru mjög heitir í fyrra hjá bæði strákum og stelpum en við erum að sjá stelpurnar meira í hælaskóm í ár.

Strigaskór við jakkaföt verður alltaf klassískt hjá strákunum, en loafers eru að koma sterkt inn í ár hjá þeim.

Við erum einnig að sjá meira fínan fatnað, jakkafötin eru að koma sterk inn. Í fyrra var meira af “casual” buxum parað við jakkafatajakka og strigaskó.

Tania segir foreldra koma í leiðangra með börnunum sínum að skoða föt og skó, bæði fermingarföt og föt á sig sjálf og það seljist alltaf meira af fínum fatnaði í verslununum NTC í kringum fermingarnar. Sumir eru fljótir að ákveða sig meðan aðrir gefa sér tíma til að skoða. Hafa krakkarnir ákveðnar skoðanir?

„Það er allur gangur á því hvort krakkarnir hafa skoðun á því hvað þau vilja en ef ég tala út frá krökkunum sem koma í tökur til okkar þá er sá hópur með sterkar skoðanir á fötunum sem þau vilja vera í sem er frábært," segir Tania.

Hér fyrir neðan má sjá fleiri myndir af krökkunum.