Harvey Weinstein lagður inn á spítala

Weinstein hefur setið í fangelsi síðan árið 2020 þegar hann var sakfelldur fyrir kynferðisbrot og dæmdur í 23 ára fangelsi. Tveimur árum síðar var hann dæmdur aftur fyrir þrjár nauðganir og sextán árum bætt við dóm hans. Fyrr í vikunni var fyrri sakfellingunni snúið við þar sem ákvarðað var að vitnisburður við réttarhöldin þar sem meintir þolendur lýstu öðrum brotum en hann var ákærður fyrir, hefðu haft áhrif á niðurstöðuna. 

Í gær var Weinstein fluttur á Bellevue-spítalann í New York til að fara í ýmsar rannsóknir en Arthur Aidala, lögmaður Weinstein, segir heilsu hans afar slæma. 

„Það virðist vera sem svo að hann þurfi mjög mikla hjálp. Hann glímir við fjölda vandamála. Hann er að fara í alls konar rannsóknir. Hann er mjög veikur,“ segir Aidala. 

Lengi vel hefur lögmannateymi Weinstein reynt að halda því fram að hann glími við fjölda vandamála, svo sem hjartavandamál, sykursýki, kæfisvefn og augnvandamál. Þá hafi hann misst fjórar tennur á meðan hann hefur setið inni.