Guðni stal senunni í Smáranum: „Sástu for­setann þarna?“

Leiknum lauk með átta stiga sigri Grindavíkur, 102-94 og halda þeir því inn í leik tvö í Keflavík með einn vinning á móti engum vinningi Keflvíkinga sem munu þurfa að spjara sig án síns besta leikmanns, Remy Martin, sem sleit hásin í leik gærkvöldsins og verður ekki meira með á þessu tímabili. 

Bæði lið sýndu fína takta í leik gærkvöldsins og var hvergi gefið eftir. Þeir sem horfðu á ættu þó að geta sammælst um að Grindvíkingar hafi átt eina flottustu körfu leiksins undir lok annars leikhluta. 

Í þeirri sókn átti Ólafur Ólafsson langa sendingu fram völlinn frá annarri endalínunni í átt að DeAndre Kane sem á einhvern óskiljanlegan hátt náði að setja niður þriggja stiga körfu úr því sem virtist nær vonlaus staða. Spjaldið og ofan í. 

Forseti Íslands, Guðni Th. Jóhannesson, var á meðal áhorfenda í Smáranum og hrifning hans af þessari spilamennsku Grindvíkinga leyndi sér ekki. Atvikið má sjá hér fyrir neðan.