Lands­net skuldar Lands­virkjun 2,4 milljarða

Forsaga málsins er sú að Landsnet hóf gjaldtöku aflgjalds og rökstuddi það með því að vísa í kostnað við að færa orku inn á flutningskerfi sitt. Hluti af flutningsfjaldi var þá færður yfir á raforkuframleiðendur í samræmi við kostnað af innmötun orku. Landsvirkjun mótmælti gjaldtökunni frá upphafi en hún tók gildi fyrsta apríl 2022.

Landsvirkjun stefndi Landsneti og Orkustofnun, sem heimilaði innheimtu gjaldsins, og krafðist þess að viðurkennt yrði að óheimilt hafi verið að innheimta gjaldið. Landsvirkjun hafði betur bæði fyrir héraðsdómi og Landsrétti.

„Í dóminum var meðal annars bent á að innmötunargjaldið væri ekki hefðbundið þjónustugjald heldur gjald sérstaks eðlis sem væri ætlað að standa undir fleiri atriðum en þjónustu. Ekki yrði litið framhjá því að með breytingum á raforkulögum árið 2011 hefði verið fellt brott ákvæði þar sem vísað hefði verið til innmötunargjalds. Eftir gildistöku laganna væri því ekki lengur mælt fyrir um álagningu slíks gjalds í raforkulögum,“ segir í tilkynningu frá Landsvirkjun vegna málsins.

Þar segir einnig að á þeim tíma sem innmötunargjald var hluti af gjaldskrá Landsnets hafi Landsvirkjun rukkað viðskiptavini sína á heildsölumarkaði og stórnotendur um innmötunargjald en að ekki hafi náðst af endurheimta að fullu þann kostnað sem fyrirtækið varð fyrir vegna uppsetningar gjaldskrárinnar.

„Nú þegar staðfesting Hæstaréttar á niðurstöðunni liggur fyrir mun Landsnet þurfa að endurgreiða þennan kostnað til raforkuframleiðendanna. Við munum því endurgreiða viðskiptavinum okkar þann kostnað sem þeir urðu fyrir á tímabilinu og almennir neytendur sem og stórnotendur vera jafn settir og þeir voru fyrir setningu innmötunargjaldsins,“ segir í tilkynningunni.