Um­deildur dómari vill trú­ræknari Banda­ríki

Lauren Windsor, frjálslynd kvikmyndagerðarkona, birti upptöku af samtali sem hún átti við Alito, einn íhaldssamasta dómaranna við Hæstarétt Bandaríkjanna, á samfélagsmiðlinum X. 

Samtalið sagði hún að hefði átt sér stað á árshátíð sögufélags Hæstaréttar Bandaríkjanna í síðustu viku. Hún hafi látist vera kristilegur íhaldsmaður og rætt við Alito um hvernig væri hægt að draga úr skautun í bandarískum stjórnmálum.

„Önnur fylkingin á eftir að vinna. Það getur verið leið til þess að vinna saman, leið til að búa saman friðsamlega en það er erfitt, þú veist, vegna þess að það er ágreiningur um grundvallaratriði sem er í raun og veru ekki hægt að ná málamiðlunum um. Það er raunar ekki hægt að miðla málum. Það er ekki eins og hægt sé að fara bil beggja,“ heyrist Alito segja.

Í framhaldinu segir Windsor við dómarann að lausnin sé að vinna siðferðislegu rökræðurnar.

„Fólkið í þessu landi sem trúir á guð verður að halda áfram að berjast fyrir því, að gera landið aftur guðrækið,“ segir hún.

„Ég er sammála þér,“ heyrist Alito, sem skrifaði sögulegan dóm hæstaréttarins sem afnam rétt kvenna til þungunarrofs, segja.

AP-fréttastofan segir að Windsor hafi einnig borið undir John Roberts, forseta hæstaréttarins, hvort að rétturinn ætti ekki að leiða bandarísku þjóðina niður kristilega braut en hann hafi ekki tekið eins vel í það og Alito.

„Ég er ekki viss um að það sé rétt,“ sagði Roberts.

Fánar tengdir kosningaafneitun Trump fyrir utan heimili dómarans

Windsor sagði tímaritinu Rolling Stone að hún hefði tekið upp samtöl sín við Alito og Roberts vegna þess leyndarhjúpar sem lægi yfir Hæstarétti Bandaríkjanna að hennar mati. Dómararnir við réttinn hafni því að vera gerðir ábyrgir fyrir gjörðum sínum þrátt fyrir stafla af sönnunum um siðabrot.

Alito hefur legið undir ámæli fyrir fána sem var flaggað fyrir utan heimili hans í Alexandríu í Virginíu skömmu eftir árás stuðningsmanna Donalds Trump á þinghúsið í janúar 2021 og annan fyrir utan sumarhús hans í New Jersey síðar.

Dómarinn hefur haldið því fram að það hafi verið Martha-Ann, eiginkona hans, sem hafi flaggað bandaríska fánanum á hvolfi vegna nágrannaerja og að honum hafi ekki tekist að fá hana til þess að taka hann niður í nokkra daga. Fáninn var um þetta leyti eitt af táknum stuðningsmanna Trump sem töldu ranglega að forsetakosningunum árið 2020 hefði verið „stolið“.

Hjónin hafa ekki skýrt eins ítarlega hvers vegna fáni sem tengist kristilegum hægrijaðarhópi sem vill að bandaríska ríkið byggi á kristnum gildum sást ítrekað við strandhýsi þeirra í New Jersey í fyrra. Sá fáni sást einnig oft á mótmælum stuðningsmanna Trump gegn kosningaúrslitunum. Alito sagði að eiginkona sín hefði einnig flaggað þeim fána og að hann hafi ekki þekkt til hans.

Alito hefur hafnað öllum kröfum um að hann segi sig frá málum sem tengjast árásinni á þinghúsið og tilraunum Trump til þess að snúa úrslitum forsetakosninganna við sem koma til kasta réttarins. Roberts, forseti hæstaréttar, afþakkaði boð þingnefndar um að ræða siðareglur dómara vegna fánamála Alito.

Nýlega hefur einnig verið fjallað um gjafir og sporslur sem hæstaréttardómararnir hafa þegið frá fjársterkum aðilum. Þar sker Clarence Thomas, sem er einnig einn íhaldssamasti dómarinn við réttinn, sem hefur þegið gjafir og ferðir að andvirði milljóna dollara, meðal annars frá fjárhagslegum bakhjarli Repúblikanaflokksins, í gegnum tíðina.