Þjóðaróperan alls ekki „úti í kuldanum“

Þar segir enn fremur að frumvarp menningar- og viðskiptaráðherra til laga um breytingu á lögum um sviðslistir, nr. 165/2019 (Þjóðarópera) verði lagt að nýju fyrir haustþing. Fjallað var um málið í Morgunblaðinu í dag en þar sagði Bryndís Haraldsdóttir, formaður allsherjar- og menntamálanefndar, að ekki væri útlit fyrir að frumvarpið færi í gegn. Þar kemur einnig fram að fjár­heim­ild­ir ráðuneyt­is­ins hafi ekki dugað til að fjármagna bæði Þjóðaróperu og hækk­un fjár­fram­laga til lista­manna­launa.

„Fram hefur komið í fjölmiðlum að Þjóðarópera sé úti í kuldanum. Svo er alls ekki. Við höldum ótrauð áfram að berjast fyrir stofnun Þjóðaróperu og undirbúningur hennar er kominn á fulla ferð með Þjóðleikhúsinu,” segir Lilja Dögg í tilkynningu á vef stjórnarráðsins í dag, og bætir við:

„Það er útilokað að gefast upp í þessari fögru vegferð. Með þessu frumvarpi er stigið mikilvægt skref í átt að aukinni samlegð sviðslista á Íslandi á 21. öld með jafnræði Þjóðleikhúss, Þjóðaróperu og Íslenska dansflokksins, auk samstarfssamnings við Sinfóníuhljómsveit Íslands.“

Í tilkynningu kemur fram að starfsemi óperunnar sé að fullu fjármögnuð og stefnt að aukningu fjárheimilda til starfseminnar á tímabili nýrrar ríkisfjármálaáætlunar. Þá segir að óperan muni hefja starfsemi sína í áföngum og að ráðherra ætli að óska eftir því að henni verði tryggt aukið varanlegt fjármagn í fjármálaáætlun 2026-2030 og að það verði aukið um 600 milljónir króna í áföngum og verði samtals 800 milljónir króna árlega frá og með árinu 2028.

Styrkir grundvöll íslenskrar óperulistar

Í tilkynningu segir að með lagasetningu um Þjóðaróperu sé áformað að styrkja grundvöll íslenskrar óperulistar sem er ein af grunnstoðum menningar á Íslandi.

„Þjóðarópera á að skapa starfsvettvang fyrir fjölda söngvara, hljóðfæraleikara, hönnuða og leikstjóra, auka fjölbreytni í menningarstarfsemi með áherslu á nýsköpun og stuðla að varðveislu og miðlun íslensks menningararfs. Í frumvarpinu er gert ráð fyrir öflugu fræðslustarfi, samstarfi við tónlistarfélög, leikfélög og kóra á landsbyggðinni, auk samstarfs við grasrót, en einnig skal stefnt að því að íslensk verk verði árlega á dagskrá. Lögð verður áhersla á öflugt starf og fjölbreytt verkefni, hefðbundin sem óhefðbundin, sem sýnd verða á ólíkum stöðum.“

Nánar á vef stjórnarráðsins.