Full­komið gagn­sæi mikil­vægt, greiði fyrir greiða ekki við hæfi

Bifreiðakaup verðandi forsetahjóna, hafa fengið mikla athygli eftir að bílaumboðið Brimborg auglýsti fyrir nokkrum dögum kaup þeirra í Facebook-færslu með mynd af þeim hjónum við bílinn sem þau keyptu.

 Myndin hefur verið fjarlægð og Halla Tómasdóttir hefur tilkynnt að hún hafi verið birt í leyfisleysi.Þá kom fram í tilkynningu hennar að þau hjón hefðu ekki notið neinna sérkjara við kaupin heldur fengið staðgreiðsluafslátt.

Egill Jóhannsson forstjóri Brimborgar sendi svo frá sér tilkynningu í morgun þar sem hann baðst velvirðingar á myndbirtingunni, misskilningur hafi orðið um að heimild til myndatöku gilti sem heimild til birtingar. Þar kemur enn fremur fram að tilvonandi forsetahjón hafi notið kjara í samræmi við það sem aðrir kaupendur fái sem uppfylli sömu skilyrði.

Engin svör borist um hversu mikinn afslátt verðandi forsetahjón fengu

Fréttastofa sendi í morgun fyrirspurn á Höllu Tómasdóttur og forstjóra Brimborgar um hversu mikill afslátturinn hafi verið en nú rétt fyrir hádegi höfðu ekki borist svör við því. Í sjónvarpsfréttum RÚV í gær var hins vegar rætt við sölumann hjá Brimborg sem tjáði fréttamanni þar að tilvonandi forsetahjón hafi fengið svokölluð skyldmennakjör.

Egill sagði hins vegar í samtali við MBL í gær að hann væri aðeins kunningi hjónanna þó svo að hann hefði þekkt þau í mörg ár. Hann er þó á meðal hundrað útvalinna sem Halla býður á innsetningarathöfn í næstu viku þar sem hún tekur við forsetaembættinu.

Nú þurfi fullkomið gagnsæi

Henry Alexander Henrysson heimspekingur og sérfræðingur í siðfræði segir málið varða almenning.

„Ég held að það sé mjög eðlilegt að málið hafi hlotið þessi viðbrögð í samfélaginu. Í fyrsta lagi þá var í upphafi misræmi í skýringum verðandi forseta og forstjóra Brimborgar. Vissulega hafa komið útskýringar síðan en það er spurning hvort þær duga. Ég held að það sé þörf á því núna að það verði fullkomið gagnsæi í sambandi við þessi bílakaup þetta verður ekkert leyst öðruvísi. Grunur um sérkjör ganga ekki,“ segir Henry.

Hin ástæðan sé að málið veki athygli á því hvort það þurfi að skrá siðareglur fyrir embættið.

„Þetta er búið að vekja upp spurningar um forsetaembættið og hvort skrá þurfi niður siðareglur.Það má ekki gleymast að það þarf að gæta sín í þessu embætti og ein stærsta óskráða reglan er að greiði fyrir greiða er ekki við hæfi í þessu embætti,“ segir Henry. 

Greiddi um 7,3 milljónir

Halla Tómasdóttir svaraði fréttastofu um verð bílsins í hádeginu en hins vegar kom ekki fram hversu mikinn afslátt hún og eiginmaður hennar fengu. Í svari hennar kemur fram að þau hjón greiddu alls sjö milljónir tvöhundruð og áttatíu þúsund krónur fyrir bílinn. 

Svar Höllu Tómasdóttur

„Ég ítreka ákvörðun mína um að koma ekki í viðtöl fyrr en eftir að ég tek við og hvað þetta mál varðar er það full útskýrt bæði af minni hálfu og af hálfu Brimborgar. Hvað verð bílsins varðar þá greiddum við 7.280m fyrir hann.“