Æfði 13 sinnum á viku fyrir ÓL: „Stans­laus á­reynsla“

Róbert Ísak verður á meðal keppenda í 100 metra flugsundi á fimmtudagsmorguninn og keppir í flokki S14 þroskahamlaðra. Hann tekur nú þátt á sínum öðrum leikum en hann keppti fyrst á Paralympics í Tókyó árið 2021 þar sem hann hafnaði í sjötta sæti í 100 metra flugsundi og setti um leið Íslandsmet í greininni.

Búast má við öðruvísi aðstæðum þar en á Covidmótinu fyrir þremur árum.

„Já, þegar við fengum ekki að fara neitt? Já, það verður gaman að sjá alla áhorfendurna og að geta farið aðeins að skoða sig um líka,“ segir Róbert Ísak í Sportpakkanum á Stöð 2.

En fyrir hverju er hann spenntastur?

„Sundinu. Það er alltaf það sem stendur upp úr,“ segir Róbert léttur.

Hann hefur þá æft af miklum krafti og nálgast sitt besta eftir smá pásu í vor.

„Þetta eru margar æfingar, um 13 æfingar á viku. Það er alltaf stanslaus áreynsla á líkamann. Svo er nuddið líka og fleira, nóg að gera. Kemst ekki mikið annað að,“ segir Róbert.

En hver eru markmiðin?

„Að hafa gaman. Reyna að komast í úrslit en bara að hafa gaman, segir Róbert Ísak sem mætir því með gleðina að vopni til Parísar: „Alltaf.“

Róbert Ísak stingur sér til sunds klukkan rúmlega hálf níu í fyrramálið. Komist hann í úrslit fara þau fram seinni partinn á morgun.

Viðtalið má sjá í spilaranum að ofan.