Hefur þrisvar komið að 13 ára syni sínum með­vitundar­lausum

Móðirin vill ekki koma fram undir nafni til að vernda friðhelgi sonar síns en hún finnur sig knúna til að varpa ljósi á þær aðstæður sem mæðginin eru föst í. Drengurinn er með ADHD en hann fann sína fjöl í íþróttum, var í landsliðinu og var sannkallað undrabarn á sínu sviði.

Móðirin lýsir drengnum sem ljúflingi með stórt hjarta. Hann sé einstaklega hæfileikaríkur og listrænn. Hún segir að nokkur atvik í lífi sonarins hafi komið upp með stuttu millibili sem urðu til þess að halla fór undan fæti hjá honum og sköpuðu að hennar sögn „hinn fullkomna storm.“

Í fyrra þurfti hann að taka sér hlé í íþróttinni sinni því hann sýndi öll einkenni ofþjálfunar en nokkrum dögum fyrir mót var honum kippt úr liðinu og við það fékk hann mikla höfnunartilfinningu og hætti að mæta á æfingar.

„Svo verður einhver uppákoma upp í skóla. Það verða einhver slagsmál sem barnið mitt kemur ekkert nálægt. Einn deildarstjórinn ákveður að búa til hóp, eins konar „terrorist watch group,“ eins og maður getur orðað það.“

Móðirin lýsir því að deildarstjórinn hafi ætlað sér að einangra hópinn sem kom að slagsmálunum en af því að sonur hennar hafði, daginn eftir hópslagsmálin, setið við hliðina á einum sem tók þátt í þeim, hafi hann verið settur í sama hóp og þeir sem tóku þátt í slagsmálunum.

„Hún [deildarstjórinn] ætlaði bara að einangra þennan hóp en einangrar hann með.“

Og þar með var hann kominn í slæman félagsskap og þá fer virkilega að halla undan fæti. Hann hætti að ástunda íþrótt sína, hætti að mæta í skólann og fór að sýna mikla áhættuhegðun.

„Svo er hann nefnilega ótrúlega viðkvæmur og það sem gerist þegar þú ert svona viðkvæmur og ert særður svona mikið þá ferðu í vörn. Við gerum það fullorðna fólkið.“

Var meðvitundarlaus í sólarhring eftir töflur

Drengurinn byrjaði síðan að drekka áfengi og fikta með efni.

„Ég kem að honum tvisvar sinnum meðvitundarlausum út af áfengi, í annað skiptið var barnið komið með 35 komma eitthvað í líkamshita þegar ég hringi á sjúkrabíl og svo í síðasta skiptið hafði hann keypt töflur af einhverjum í þessum hópi og var meðvitundarlaus í sólarhring eftir það á spítala.“

Hvernig tilfinning er það að koma að barninu sínu meðvitundarlausu?

„Þetta er bara áfall sko, sem enginn á að þurfa að upplifa.“

Í fjögur skipti hefur þurft að neyðarvista drenginn á Stuðlum.

„Þú ert með ungan einstakling, það er engin aldursskipting inni á Stuðlum og það sem gerist er að þú setur þrettán ára einstakling í viðkvæmri stöðu með einstaklingum sem eru kannski sautján ára í gæsluvarðhaldi fyrir eitthvað alvarlegt.“

Tveir starfsmenn barnaverndar líflínan hennar

Móðirin segir að það sé hennar mat og reynsla að starfsfólkið í kerfinu sé allt af vilja gert en að það hafi ekki tólin. Hún lýsir tveimur starfsmönnum barnaverndar sem sinni líflínu sem hafi barist eins og ljón fyrir hagsmunum drengsins.

„Þetta eru klárlega einstaklingar sem vinna af hugsjón. Ég öfunda ekki þetta fólk fyrir að vera að vinna í þessum aðstæðum. Þú hlýtur að vera bjargarlaus þegar þú ert að reyna að gera eitthvað en færð ekki tæki og tól.“

Hún segir að barnið sitt eigi mun frekar heima inni á lokaðri deild á BUGL, þar sem hann gæti stundað skóla og fengi að hitta viðeigandi fagaðila en það eina sem standi drengnum til boða vegna aldurs sé neyðarvistun inni á Stuðlum.

Börn í vanda geti ekki beðið eftir hjálp

Þrátt fyrir að móðirin telji ýmislegt ábótavant á Stuðlum sé það eina úrræðið sem standi til boða en hún sótti um þjónustu meðferðardeildar Stuðla fyrir drenginn í júlí og blöskrar að barnið þurfi að bíða eftir þjónustu á svo afdrifaríku tímabili í hans lífi.

„Og fær hann það kannski samþykkt og hvað, þarf ég þá að bíða í þrjá mánuði? Ég lifi ekki af í þrjá mánuði lengur af þessu. Það er bara svoleiðis.“

Líður þér eins og þú sért á það slæmum stað?

„Ég er bara gjörsamlega örmagna, alveg gjörsamlega örmagna. Ef ég væri ekki svona þrjósk. En hvað gerir maður ekki fyrir börnin sín?“

Móðirin lýsir síðustu mánuðum sem ótrúlegum raunum. Hún hefur lítið sem ekkert sofið vegna ótta og áhyggna um að drengurinn laumist út að nóttu til og fari sér að voða. „Ég sef bara með annað augað opið.“