Eitt barn útskrifað af gjörgæslu

Lovísa Arnardóttir skrifar 31. október 2024 11:09

Leikskólinn er lokaður og sóttvarnalæknir mun segja til um það hvenær börnin megi mæta. Vísir/KTD

Eitt barn hefur verið útskrifað af gjörgæslu Landspítalans vegna E. coli sýkingarinnar sem greindist á leikskólanum Mánagarði í síðustu viku. Ellefu eru inniliggjandi og enn fjögur á gjörgæslu. Greint er frá á vef RÚV. Rannsókn á E.coli smiti á leikskólanum Mánagarði beinist aðallega að mati sem börnin neyttu þann 17. október. Þá fengu börnin hafragraut, spaghettí og melónur í kaffitímanum.

Alls hafa 45 börn smitast af E.coli veirunni frá því í síðustu viku. Í frétt RÚV kemur einnig fram að enn séu 20 börn undir eftirliti lækna á Landspítalanum.

Fjölmörg matvælasýni eru nú til rannsóknar en fram kemur í sameiginlegri tilkynningu sóttvarnalæknis, Matvælastofnunar og Heilbrigðiseftirlits að rannsóknirnar séu vandasamar og tímafrekar.Niðurstöður úr rannsókninni verða birtar með fréttatilkynningu á heimasíðum sóttvarnalæknis, Matvælastofnunar og Heilbrigðiseftirlits Reykjavíkur þegar þær liggja fyrir.

Í tilkynningu kemur jafnframt fram að í rannsókninni beinist athyglin að fimmtudeginum 17. október vegna þess að þá hafi öll börnin sem hafi veikst fyrstu dagana verið í leikskólanum. Líklega sé um matarborið smit að ræða vegna þess að veikindi barnanna hófust á svipuðum tíma og dreifðust yfir allar deildir skólans. Af sömu ástæðu er talið ólíklegra að smitið sé upprunalega frá umhverfi eða barna á milli. Það sé þó ekki hægt að útiloka það.

Í tilkynningunni er farið ítarlega yfir matseðilinn þann 17. október. Börnin fengu í morgunmat hafragraut og svo hakksósu eða linsubaunarétt og spaghettí í hádegismat. Í kaffitíma fengu þau melónur.

Leikskólinn enn lokaður

Heilbrigðiseftirlit Reykjavíkur fer með rannsókn á vettvangi og hefur tekið fjölmörg matvælasýni til rannsóknar, af matvælum sem var boðið uppá þennan dag. Jafnframt hafa heilbrigðisfulltrúar farið í eftirlit í leikskólann, farið yfir verklag, metið aðstæður og farið fram á úrbætur eftir tilefni. Eftir að hópsýkingin kom upp hefur leikskólinn verið þrifinn hátt og lágt, auk þess sem leikföng og annar búnaður hefur verið sótthreinsaður. Leikskólinn er enn lokaður og verður ákvörðun um opnun tekin af rekstraraðila í samráði við stýrihóp. Sóttvarnalæknir mun gefa út leiðbeiningar varðandi hvenær börnin geta mætt aftur í skólann.

Í tilkynningu er einnig farið yfir það hvað E.coli er og hvernig bakterían smitast.

„E. coli bakteríur eru hluti af náttúrulegri þarmaflóru manna og dýra og geta borist í vatn, kjöt, grænmeti og önnur matvæli við framleiðslu þeirra. Mismunandi tegundir E. coli eru til. Shigatoxin myndandi E. coli (STEC) bera gen sem mynda eiturefni sem valda veikindunum (meinvirknigen). Stofnar þeirra geta þó verið mis sjúkdómsvaldandi.“

E.coli í íslensku lamba- og nautgripakjöti

Þá segir að Matvælastofnun hafi árið 2018 greint frá skimun á tilvist sjúkdómsvaldandi baktería í íslensku kjöti á markaði hérlendis. Þar hafi komið fram að STEC meinvirknigen fundust í tæplega 30% sýna af lambakjöti og 11,5% sýna af nautgripakjöti. Sambærilegar rannsóknir hafa ekki verið gerðar á grænmeti, ávöxtum eða öðrum matvælum hér á landi.

E. coli-sýking á Mánagarði Heilbrigðiseftirlit Heilbrigðismál Landspítalinn Börn og uppeldi

Tengdar fréttir

Færri börn undir eftirliti vegna E.coli en enn fimm á gjörgæslu

Guðrún Aspelund sóttvarnalæknir á ekki von á því að niðurstöður úr rannsókn á uppruna E.coli smits á Mánagarði liggi fyrir fyrr en í fyrsta lagi við lok vikunnar eða um helgina. Leikskólinn er enn lokaður. Tíu börn eru undir undir eftirliti á bráðamóttöku Barnaspítalans eins og er samkvæmt upplýsingum frá Landspítalanum. Auk þess eru tíu börn inniliggjandi, þar af eru fimm á deild og fimm á gjörgæslu.

30. október 2024 11:43

Fimm börn alvarlega veik á gjörgæslu vegna E.coli sýkingar

Alls eru nú tíu börn inniliggjandi á Landspítalanum vegna E.coli sýkingar. Samkvæmt upplýsingum frá Landspítalanum eru þar af fimm þeirra á gjörgæslu. Um 40 börn eru undir eftirlit vegna sýkingarinnar. E. Coli sýking getur leitt til alvarlegar nýrnabilunar og því eru börn sem eru á gjörgæslu í blóðskilun.

29. október 2024 21:17

Þrjú börn á gjörgæslu vegna E.coli sýkingar

Alls eru nú 42 börn undir eftirlit á Landspítalanum vegna E. Coli sýkingar sem kom upp á leikskólanum Mánagarði í síðustu viku. Samkvæmt upplýsingum frá Landspítalanum eru 11 af þeim inniliggjandi og þrjú þeirra á gjörgæslu alvarlega veik.

28. október 2024 10:46

Mest lesið

Fleiri fréttir