Hrókeringar í fram­kvæmda­stjórn Eim­skips

Í tilkynningu þess efnis á vef Eimskips segir að innanlandssviði tilheyri innanlandsflutningar, vörudreifing, starfsemi vöruhúsa og frystigeymslna ásamt fasteignaumsjón. Þá heyri dótturfyrirtækið Sæferðir einnig undir sviðið. Á sviðinu starfi um 400 starfsmenn á átján starfsstöðvum víðsvegar um landið.

Edda hafi hafið störf sem markaðs- og samskiptastjóri Eimskips árið 2019 en hafi verið framkvæmdastjóri mannauðs- og samskiptasviðs félagsins frá árinu 2020. Þar áður hafi hún starfað hjá Íslandsbanka í tólf ár í ýmsum hlutverkum, síðast sem forstöðumaður sölu- og viðskiptastýringar á fyrirtækja- og fjárfestasviði bankans. Edda sé með B.Sc. í viðskiptafræði með áherslu á tölvunarfræði frá Háskólanum í Reykjavík. Hún sé varaformaður Samtaka verslunar og þjónustu ásamt því að sitja í stjórn og framkvæmdastjórn Samtaka atvinnulífsins.

Harpa tekur við

Harpa Hödd Sigurðardóttir hafi verið ráðin framkvæmdastjóri mannauðs- og samskiptasviðs í stað Eddu. Harpa hafi starfað hjá Eimskip frá árinu 2019 í nokkrum hlutverkum á mannauðs- og samskiptasviði, síðast sem forstöðumaður fræðslu og þróunar. Áður en Harpa hóf störf hjá Eimskip hafi hún starfað við mannauðsmál hjá Lyfju hf.. Harpa sé með B.Sc. í sálfræði og M.Sc. í mannauðsstjórnun frá Háskóla Íslands. Mannauðs- og samskiptasviði tilheyri mannauðs-, markaðs- og samskiptamál. Sjálfbærnimál sem áður tilheyrðu sviðinu flytjist á fjármálasvið.

Samhliða þessum breytingum láti Jónína Magnúsdóttir, sem verið hafi framkvæmdastjóri innanlandssviðs af störfum og henni séu færðar þakkir fyrir starf sitt fyrir félagið. Breytingarnar taki nú þegar gildi.

Reynsla og þekking komi að góðum notum

„Edda Rut hefur verið í framkvæmdastjórn Eimskips frá árinu 2020 og þekkir starfsemi og viðskiptavini félagsins vel. Hún hefur borið ábyrgð á viðamiklum málaflokkum þvert á fyrirtækið og mun sú reynsla og þekking koma að góðum notum í nýju starfi meðal annars þegar kemur að ræktun viðskiptasambanda. Framundan eru spennandi en jafnframt krefjandi verkefni á innanlandssviði. Væntingar og þarfir viðskiptavina eru í stöðugri þróun og okkar markmið er að veita ávallt framúrskarandi þjónustu og vaxa með viðskiptavinum okkar um allt land,“ er haft eftir Vilhelm Má Þorsteinssyni, forstjóra Eimskips.

Á sama tíma sé ánægjulegt að sjá Hörpu stíga upp og taka sæti í framkvæmdastjórn félagsins.

„Hluti af vegferð okkar á síðustu árum hefur verið að styrkja menningu og þróa mannauð félagsins og hefur Harpa verið í lykilhlutverki á þeirri vegferð. Harpa hefur unnið með stjórnendum og starfsfólki þvert á félagið, ekki síst í verkefnum tengdum starfsstöðvum erlendis, og meðal annars leitt leiðtogaþróun félagsins. Á sama tíma og ég þakka Jónínu fyrir hennar störf og óska henni velfarnaðar, hlakka ég til að vinna með Eddu og Hörpu í nýjum hlutverkum.“