Ergir kirkjuna enn á ný með fölskum Frans páfa

Hún birti myndirnar tvær í hringrás (e. story) sinni á Instagram. 

Á fyrri myndinni má sjá hinn 87 ára Frans knúsa hina 66 ára Madonnu frá hliðinni og þrýsta nefi sínu upp að andliti hennar. Við myndina skrifaði hún: „Á leið inn í helgina svona...“.

Á hinni myndinni má sjá Madonnu í lífstykki og heldur Frans þar utan um mitti hennar og virðist ætla sér að kyssa hana. Við þá mynd skrifaði hún: „Það er gott að vera séð....“.

Myndirnar vöktu misjöfn viðbrögð netverja. Einhverjum fannst myndirnar vera dónalegar, öðrum óhuggulegar og jafnvel ógeðslegar. Aðrir gátu ekki annað en hlegið að fíflalátunum í poppstjörnunni. Enn er beðið eftir viðbrögðum kirkjunnar.

Elskar að hneyksla kirkjuna

Madonna er ekki óvön því að hneyksla fólk og hefur gert það allan sinn ferill. Engan hefur hún þó hneykslan eins mikið og kaþólsku kirkjuna en það má upphaflega rekja til tónlistarmyndbandsins fyrir „Like a Prayer“ sem kom út 1989.

Myndbandið sýnir Madonnu verða vitni að hópnauðgun og morði hvítra manna á hvítri konu en svartur maður er síðan handtekinn fyrir glæpinn. Þá má sjá meðlimi Ku Klux Klan brenna krossa í myndbandinu og Madonnu kyssa svartan dýrling.

Myndbandið vakti svo hörð viðbrögð að Vatíkanið fordæmdi myndbandið og Jóhannes Páll II páfi hvatti fólk til að sniðganga Blond Ambition-tónleikaferðalag söngkonunnar 1990. 

Á sama tíma hvöttu trúarhópur til sniðgöngu á Pepsi sem höfðu notað lagið í auglýsingu sinni. Það varð til þess að fyrirtækið sleit samningi sínum við stjörnuna og tók auglýsinguna úr loftinu. Madonna fékk á endanum leyfi til að birta auglýsinguna í september 2023 og má sjá hana hér að neðan.

Samband Madonnu við kaþólsku kirkjuna hélst áfram stirt. Kardínálinn Ersilio Tonino hvatti til bannfæringar Madonnu eftir að hún var með platkrossfestingu á tónleikum sínum í Róm 2006.

Hún virtist þó vera tilbúin að sættast ef marka má tíst hennar frá maí 2022 þar sem hún ávarpaði Frans páfa beint. 

„Ég er góður kaþólikki. Ég sver það! Ég meina, ég sver ekki! Það eru liðnir nokkrir áratugir frá síðustu játningu. Væri mögulegt að hittast einn daginn til að ræða mikilvæg málefni? Ég hef verið bannfærð þrisvar sinnum. Það hljómar ekki sanngjarnt. Einlæglega Madonna“

Frans páfi svaraði aldrei tístinu en það er spurning hvað hann segir við gervigreindarmyndunum af sér að þukla á Madonnnu.